Alibi ng PPCRV binatikos
MANILA, Philippines – “Bulok na alibi!”
Ito ang tugon ng partylist group na Confederation of Non-Stock Savings and Loans Associations Inc. (CONSLA) sa katuwiran ng Parish Pastoral Council for Responsible Voting (PPCRV) na ang hindi pagkakatugma ng ipinalabas nitong boto ng una ay dahil sa problema sa “connectivity” sa internet.
Ayon kay Atty. Jose Emmanuel G. Hernandez, dapat na magkaroon ng masusing imbestigasyon ang Commission on Election hinggil sa nasabing isyu lalo’t umamin ang PPCRV na nagkaroon ng problema sa koneksiyon sa internet sa kasagsagan ng bilangan ng boto ng mga partylist group.
Unang inamin nina PPCRV Communications and Media Director Ana de Villa Singson at Chairman, Amb. Henrietta de Villa ang umanoy “connectivity issue” kaya nagkaroon ng pagkakaiba ang kanilang ipinalabas na resulta ng boto mula sa datus ng Comelec.
Nakakapagtaka rin aniya dahil ito ang unang pagkakataon na inamin ng PPCRV na nagkaproblema sila sa koneksyon ng computer sa pagbibilang ng boto subalit wala naman itong ipinalabas na abiso sa mga apektadong partylist groups.
Sa isinumiteng reklamo ng CONSLA, sinabi nito na imposibleng matalo ito sa nagdaang eleksiyon dahil sa quick count ng PPCRV may nakuha na itong boto na 342,513 noong Mayo 9 at kinabukasan ganap na alas-11 ng umaga ay umangat pa ito ng 523,753 boto at dakong alas-12 ng hapon ay umabot pa ng 555,896 ang boto nito kaya nakaakyat ng rank 14.
- Latest