Matapos palayain ang bihag na Pinay, Norwegian hostage inaasahang palalayain din
MANILA, Philippines – Nananalig ang Armed Forces of the Philippines (AFP) na ligtas na lalaya ang bihag na Norwegian na hawak pa rin ng mga bandidong Abu Sayyaf sa lalawigan ng Sulu.
Ito’y matapos na pakawalan na nitong Martes ng madaling araw ng mga bandidong kidnappers ang Pinay hostage na si Maritess Flor.
Gayundin, bunga ng pahayag ni incoming President Rodrigo “Digong” Duterte kaugnay ng inaasahang paglaya nang ligtas ni Kjartan Sekkingstad kung saan ay pinasalamatan na ito ng Norwegian government.
Si Flor ay pinalaya ng mga kidnaper dakong alas- 4:30 ng madaling araw sa harapan ng tahanan ni Gov. Abdusakur “Toto” Tan sa Brgy. Asturias, Jolo, Sulu.
Sinabi ni AFP Spokesman Brig . Gen. Restituto Padilla na patuloy ang pagsusumikap ng military troops upang ligtas na mabawi ang Norwegian hostage na si Sekkingstad, ang nalalabing hostage na kasama ni Flor na dinukot.
“The safe release of other captives remains a vital objective of continuing military and law enforcement operations against the ASG”, ani Padilla.
Magugunita na ang dalawa pang kasamahang bihag nina Flor kabilang ang kaniyang boyfriend na si Canadian Robert Hall at kasamahan nitong si John Ridsdel ay pinugutan ng ulo ng mga bandidong Abu Sayyaf Group.
Ang Canadian na si Ridsdel ay unang pinugutan ng ulo noong Abril 25 matapos mabigong magbayad ng P300M ransom habang si Hall ay nito namang Hunyo 13 na nabigo namang magbayad ng P600M.
Sa pahayag naman ng iba pang mga opisyal sinabi ng mga ito na ipagdasal ang kaligtasan ng mga hostages.
- Latest