Gov’t kakasuhan sa ‘di pagbabayad ng honorarium ng mga guro

MANILA, Philippines - Pinag-aaralan na ni Act Party-list Rep. Antonio Tinio ang pagsasampa ng kaso laban sa gobyerno dahil sa hindi pagbabayad ng honorarium sa mga gurong nagtrabaho sa katatapos na May 9 elections.

Ayon kay Tinio, malinaw sa iniakdang Republic Act 10756 o Election Service Reform Act na election offense kung hindi mababayaran ang honorarium ng mga guro sa tamang oras.

Itinatakda din sa batas na kailangang mabayaran ang honorarium  ng mga gurong naglingkod sa halalan sa loob lamang ng 15 araw.

Kaya maaari umanong kasuhan ang sinumang opisyal na dahilan ng pagkaantala ng kumpensasyong ito.

Dismayado ang mambabatas dahil 18 araw na ang nakalilipas matapos ang eleksyon ay libu-libo pa ring mga guro ang hindi nababayaran.