Wagi ni Robredo tiyak – de Lima

MANILA, Philippines - Naniniwala si senator-elect Leila de Lima na si Leni Robredo ang ipoproklamang bise presidente pagkatapos ng bilangan sa Kongreso. Sa isang panayam, iginiit ni de Lima, na kasama sa legal team ni Robredo bilang overall consultant, na batay sa mga nakita at napag-aralan niyang mga dokumento, wala nang kuwestiyon ang panalo ng kanyang kliyente.

“We are very, very confident that at the end of the day, at the completion of canvass, it is our candidate who will be proclaimed as the duly elected Vice President of the country,” wika ni de Lima, na dating election lawyer bago naging chairperson ng Commission on Human Rights at kalihim ng Department of Justice.

Kumpiyansa rin si de Lima na hindi magkakaroon ng problema ang canvassing ng Kongreso dahil wala siyang nakikitang dahilan na posibleng gamitin ng kalabang kampo para maantala ito.

“Hindi puwedeng basta-basta na lang nilang sasabihin na we are going to object to all, to each and every COCs being presented or to most of the COCs being presented on any ground, on imagine, on frivolous, phase-less ground,” paliwanag ni de Lima.

“I’m sure the joint committee will not go for that at kung mayroong ilan-ilan diyan na COC na sasabihin nila ay mayroong depekto, anumang depekto riyan, anumang deficiency niyan, I’m sure there won’t be a proper explanation and at least hindi magkakaroon ng tunay na ground para i-defer ang canvass of a particular COC,” giit pa niya.

Sa pagtatapos ng unang araw ng bilangan noong Miyerkules, lamang si Robredo ng 295,492 sa katunggaling si Ferdinand Marcos Jr. Mula sa 45 certificates of canvass na binilang ng national board of canvassers (NBOC) mula sa iba’t ibang bahagi ng bansa, nakakuha si Robredo ng 3,576,643 boto habang si Marcos ay may 3,281,151.