Duterte nag-sorry kay Trudeau sa pagkasawi ng Canadian hostage

MANILA, Philippines — Humingi ng paumanhin si incoming president Rodrigo Duterte kay Canadian Prime Minister Justin Trudeau sa pagkasawi ng Canadian hostage ng bandidong grupong Abu Sayyaf nitong nakaraang buwan.

Sa pag-uusap sa telepono nina Duterte at Trudeau, tiniyak ng kasalukuyang alkalde ng Davao na pananagutin niya sa batas ang mga nasa likod ng pagpugot ng ulo ni John Ridsdel noong Abril 25 sa Sulu.

"I said 'Mr. Prime Minister, please accept my apologies for the incident. We will try our very best and see to it that it will never happen again. and rest assured that the time comes we will be able to apprehend the criminals and exact justice,"  ani Duterte.

Pinugutan ng ulo si Ridsdel matapos walang magbayad ng hinihingi nilang ransom. Kinabukasan matapos makita ang ulo niya ay natagpuan ang isang bangkay na walang ulo na sa tingin ng mga awtoridad ay ang katawan ng Canadian.

Samantala, natalakay din nina Duterte at Trudeau sa siyam na minuto nilang pag-uusap ang tungkol sa human rights.

Sinabi ng incoming president na nabanggit ng prime minister ang tungkol sa pagsunod sa Universal Declaration of Human Rights.

"I'm following it. I said that we are partners, may we remain partners for all time," patuloy ni Duterte.

"Universal Declaration of Human rights, fine, I said 'I'm following it, but Mr. Prime Minister, with few exceptions."

Binabatikos si Duterte dahil sa umano’y pagsasawalang bahala niya sa karapatang pantao dahil sa kaniyang mga banta na pagpatay sa mga kriminal.

Bukod kay Trudeau, nauna nang tinawagan ni United States President Barack Obama si Duterte.