Ombudsman pinababawi ang bail ni Napoles, ex-Masbate guv

MANILA, Philippines — Inapela ng Office of the Ombudsman ngayong Huwebes ang pagpayag ng Sandiganbayan na makapagpiyansa ang tinaguriang pork barrel scam mastermind Janet Napoles at nasipang Masbate Gov. Rizalina Lañete.

Iginiit ng Ombudsman sa kanilang motion for reconsideration na malinaw na kabilang si Lañete sa mga opisyal ng gobyerno na naglagak ng kani-kanilang priority development assistance fund o pork barrel sa mga pekeng non-government organization ni Napoles.

Dagdag nila na sapat ang mga ebidensya na nagpapatunay na higit P50 milyon ang kinita ng dating gobernador para makasuhan ng plunder.

"Contrary to the honorable court's ruling, the evidence on record clearly established that the amount of ill-gotten wealth amassed by the accused surpassed the legal threshold for plunder," nakasaad sa mosyon.

"The evidence of the prosecution was measured against legal standards and evidentiary burdens that are not applicable to bail proceedings in particular and to corruption cases in general," dagdag nito.

Sa halagang P500,000 kada isa ay pinayagan ng anti-graft court na makapagpiyansa sina Napoles at Lañete.

Sa kabila nito ay hindi naman maaaring makalaya si Napoles matapos mahatulan ng life sentence para sa kasong illegal detention na inihain ng kaniyang kamag-anak at pork barrel scam whistleblower Benhur Luy.

Kapwa nakakulong ang dalawang akusado sa Camp Bagong Diwa sa Taguig City.