Pagpanaw ni Señeres, ikinalungkot ng OPAP
MANILA, Philippines – Nagpahayag ng kalungkutan at panghihinayang ang pamunuan ng Overseas Placement Association of the Philippines (OPAP) sa pagpanaw ni Ambassador at OFW Family Club party-list Rep. Roy Señeres.
Sinabi ni OPAP President Alice Devulgado, malaking kawalan si Seneres sa sektor ng mga manggagawa lalo na sa mga milyun-milyong OFW na kinikilala siya bilang kakampi at tapagtanggol nila.
Ayon kay Devulgado, napakamatulungin ni Señeres lalo at higit sa mga adhikain na alam niyang makatutulong sa mga manggagawa at mga OFW at lehitimong mga placement agency.
Ang OPAP ang isa mga pinakamatagal at respetadong samahan ng mga lehitimong placement agency sa bansa at nasa likod ng pagsasabatas ng ilang mga panukalang naglalayong protektahan ang mga OFW katulad ng Migrant Workers Act.
Sa kanyang panig ay sinabi naman ni OPAP Chairman Nikki Quibrantar na malaking kawalan si Señeres hindi lamang ng mga manggagawa kundi maging ng buong bansa.
Naalala rin ni Quibrantar na todo-suporta si Señeres sa OPAP kaya’t hindi ito nagdalawang isip na siyang manguna sa oath taking ng mga bagong halal na opisyal ng samahan noong Disyembre sa kabila ng maikling panahon at abiso.
Namatay si Señeres tatlong araw matapos niyang ideklara na hindi na siya tatakbo bilang pangulo ng bansa dahil na rin sa iniinda niyang sakit.
- Latest