Kandidato ‘di obligadong ilantad ang health condition
MANILA, Philippines – Tahasang sinabi ng election lawyer na si Atty. Romulo Macalintal na hindi maaaring obligahin ang isang kandidato na ilabas ang kanyang health condition.
Ayon kay Macalintal, hindi rin umano kasama sa qualification para makatakbo sa mataas na posisyon ang kalusugan ng isang kandidato.
Bagama’t may ilan na handang maglahad ng health record, hindi umano ito pwedeng ipagpilitan ng Commission on Elections (Comelec) o ng iba pang ahensya ng gobyerno.
Naging usapin ito, ilang araw matapos masawi ang isa sa mga kandidato sa pagka-pangulo na si dating Amb. Roy Señeres.
Habang may iba pang kandidato na una nang lumutang ang isyu sa kalusugan subalit tuloy pa rin sa mga aktibidad ukol sa kanilang kampanya.
Maging ang mga opisyal ng Comelec ay aminadong hindi nila magawang mapilit ang bawat kandidato na maglahad ng kanilang health records dahil hindi ito nakasaad sa saligang batas o maging sa Fair Elections Act.
Para kay Comelec Chairman Andres Bautista, mainam kung transparent sa tunay na estado ng kalusugan ang isang kandidato dahil may mga botante na basehan ito ng ihahalal nilang lider.
- Latest