Bandila na ginawang basahan, iniimbestigahan ng DepEd

MANILA, Philippines – Iniimbestigahan na ng pamunuan ng Department of Education (DepEd) ang nag-viral na video sa internet kung saan ginamit na basahan o floor mat ng isang estudyante ang bandila ng Pilipinas.

Ayon kay DepEd Assistant Secretary Tonisito Umali, tulad ng reaksyon ng iba, maging siya ay nagulat at nalungkot dahil sa ginawa ng naturang estudyante.

Aniya, mahigpit na ipinagbabawal sa ilalim ng batas ang paglapastangan sa watawat ng Pilipinas. Ang ganitong kalapastanganan ay may katapat na kaukulang parusa.

Umapela rin si Umali sa mga mamamayan, partikular sa mga estudyante, na igalang at bigyang-respeto ang watawat ng Pilipinas.

Kinumpirma naman ng University of the East (UE) Manila na estudyante nila ang nabidyuhang inilalampaso ang watawat.

Habang isinusulat ang balitang ito ay nasa mahigit isang milyon na ang views ng video.