Ombudsman kinasuhan ang dating opisyal ng LRTA

MANILA, Philippines – Sinampahan ng kasong graft ng Ombudsman ang ilang dating opisiyal ng Light Rail Transit Authority (LRTA) kaugnay sa maanumalyang kontratang kanilang inaprubahan para sa maintenance at janitorial services.

Ang mga kinasuhan nila ay sina sating Administrator Melquiades Robles, Federico Canar, Jr., Dennis Francisco, Evelyn Macalino, Marilou Liscano, Elmo Stephen Triste, Eduardo Abiva, Nicholas Ombao, Roger Vaño, Maynard Tolosa at Juliet Labisto.

Dagdag pa rito ang kasong misconduct kina Canar, Francisco, Triste, Macalino, Liscano, Abiva, Ombao, Vaño, Tolosa at Labisto

Kasama rin sa kinasuhan ang service providers na sina Lilia Diaz at Dennis Acorda ng joint venture ng COMM Builders and Technology Philippines, Corporation, PMP Inc. at Gradski Soabracaj GRAS.

Ayon sa desisyon na inilabas ng Ombudsman, nilabag ng mga dating opisyal ng LRTA ang Section 3(e) ng Anti-Graft and Corruption Practices Act (Republic Act No. 3019) matapos nilang ipatupad ang maanumalyang kontrata sa pagitan nila at ng nasabing joint venture.

“It is rather unfortunate that some public respondents aided the contractor in its desire to reduce its committed number of janitorial workforce,” saad sa resolusyon.

Noong 2009 nang lagdaan ng mga dating opisyal ng LRTA ang kontrata sa joint venture para sa maintenance ng mga tren, riles, at depot facilities. Ayon sa kontrata, obligado ang service providers na magpadala ng 793 na manggagawa at janitors.

Ngunit ayon sa dokumentong hawak ng Ombudsman, nasa 209 na manggagawa lamang ang kanilang ipinadala kahit pa na ang binayaran na sa kanila ay para sa tauhan at materyales na nagkakahalaga ng P400.6 million.

Dagdag pa nila, “The disbursement vouchers of the series of monthly transactions had been processed without payrolls.”

“Instead of pushing for the implementation of the awarded contract, the respondents agreed to the reduction of janitorial manpower,” pahayag ni Ombudsman Conchita Caprio Morales.

Ayon sa resolusyon, walang anumang dahilan ang joint venture para hindi tuparin ang nasa kasunduan, na napahaba pa hanggang Hulyo 2013.