Mar-Leni campaign larga na
MANILA, Philippines - “No place like home” ang tema ng simula ng kampanya ng Tambalang Daang Matuwid nina Mar Roxas at Camarines Sur Rep. Leni Robredo ngayong araw para sa kick off event ng Partido Liberal sa Capiz Gymnasium.
Kumpleto rin ang mga pambato sa Senado ng dalawa, sa pangunguna ni incumbent Senate President Franklin Drilon.
Ayon kay Daang Matuwid Coalition spokesperson Barry Gutierrez pagbibigay pugay ito ni Roxas sa kanyang pinagmulan, lalo na ngayong tumatakbo siya sa pinakamataas na puwesto.
Tiyak na rin ang pagdating ng pinakabigating endorser ni Roxas na si Pangulong Aquino na dadalo upang siguraduhin ang suporta para kay Roxas at Robredo.
Nauuna nang dineklara ni PNoy ang kanyang balak na umikot at mangampanya para sa dalawa dahil naniniwala itong sila lamang ang makakapagsilbi ng matino at mahusay sa mga Pilipino.
Inaasahang mainit ang magiging pagtanggap ng mga kasimanwa o kababayan ni Roxas sa kanya at mga kapartido. Ipinagmalaki ng mga lokal na opisyal ng Roxas City na handa na sila para sa todo suporta kay Roxas.
Mahigit 10,000 suporter ng Roxas-Robredo tandem ang inaasahang dadalo.
Matatapos ang linggo ng kick off ng dalawa sa Naga, ang tahanan ni Robredo at ng kanyang namayapang asawa, dating DILG Secretary at matalik na kaibigan ni Roxas na si Jesse Robredo.
- Latest