Binay may sariling presidential survey pero ‘di ilalabas ang resulta

MANILA, Philippines – Matapos ilabas ng Liberal Party ang resulta ng kanilang sariling presidential survey, sinabi ni Bise Presidente Jejomar Binay na mayroon din sila ngunit hindi nila isasapubliko ang kinalabasan.

Minaliit ni Binay ang survey ng LP kung saan lumabas na nakakuha ng 53 percent si Interior secretary Mar Roxas, habang siya ay mayroong 37 percent.

Aniya ginawa lamang ito ng LP upang palakasin ang kanilang loob ilang buwan bago ang eleksyon 2016.

"Nagpapalakas ng loob lang 'yan. Ang nagsisinungaling lagi hanggang sa naniniwala na sila sa kasinungalingan nila,” pahayag ng bise presidente.

Inamin ni Binay na nagsagawa rin ang kaniyang United Nationalist Alliance ng sariling survey, ngunit sakanila na lamang ang naging resulta nito.

"Meron kami pero di namin sasabihin. Di naman kami gumagawa ng ganun na di kapani-paniwala."

Samantala, sinabi ni LP vice chairman at Senate President Franklin Drilon na hindi layunin ng kanilang pinondohang survey na lokohin ang publiko.

"If we have intention to cheat, we are also cheating ourselves because we spent money for it."

Isinagawa ang survey kung saan ipinalagay nilang sina Binay at Roxas lamang ang tatakbong pangulo.

Sa kasalukuyan tanging sina Binay at Roxas pa nga lang ang kumpirmadong tatakbo, habang hindi pa pormal na nagpapahayag si Senador Grace Poe at Davao City Mayor Rodrigo Duterte.