‘Epal’ na pulitiko bawal sa graduation

MANILA, Philippines - Bawal ang mga ‘epal’ na pulitiko sa mga graduation rites ng mga estudyante na magsisipagtapos sa mga pampublikong paaralan sa bansa.

Ito ang paalala ng Department of Education ­(DepEd), tatlong linggo bago ang nakatakdang pagtatapos ng mga mag-aaral.

Ayon kay DepEd Sec. Armin Luistro, dapat gawing politics-free ang graduation rites, solemn, naka-pokus sa mga estudyante at kanilang mga magulang.

Hindi anya venue para sa anumang political forum ang pagtatapos ng mga mag-aaral.

Sa panig naman ni Education Undersecretary Tonisito Umali ay nagsabing maaari namang dumalo ang mga opisyal ng pamahalaan tulad ng mga alkalde sa graduation rites, ngunit hindi dapat na ‘umepal’ ang mga ito.

Aniya, maaaring magbigay ang mga ito ng inspirational message sa mga magsisipagtapos ngunit nanawagan na hindi dapat na mapulitika ang okasyon.

Una nang itinakda ng DepEd ang graduation rites ngayong taon sa Marso 26 at 27.