Malacañang umapela sa banta ng kudeta
MANILA, Philippines – Matapos lumutang ang ulat na posibleng may maglunsad ng kudeta laban sa administrasyong Aquino, umapela kahapon ang Malacañang na dapat maging mahinahon ang lahat partikular ang mga nagbibigay ng “komentaryo” at “suhestiyon” kaugnay sa nangyaring pagpatay sa 44 miyembro ng PNP-Special Action Force.
Ayon kay Communications Sec. Sonny Coloma, nauunawaan nila ang mabigat at mataas na emosyon kaugnay sa pagkamatay ng 44 SAF pero dapat pa ring maging mahinahon ang lahat.
Sinabi ni Coloma na kung paiiralin ang silakbo ng damdamin at emosyon ay posibleng mawala sa focus ang gobyerno na nagnanais maghatid ng pangmatagalang kapayapaan sa bansa.
Samantala, sa gitna ng ulat na may 43 kasapi ng administrasyon na nagbabalak na bawiin ang suporta sa isinusulong na Bangsamoro Basic Law, sinabi ni Coloma na marami pa ring mga lider ng bansa ang naniniwala na dapat isulong ang pangmatagalang kapayapaan.
Dapat aniyang tingnan ang mas malaking larawan na ihahatid ng pangmatagalang kapayapaan.
Sa ngayon ay wala pang anunsiyo si Pangulong Aquino kung kakausapin nito ang mga kapanalig na sinasabing nagbabalak bawiin ang suporta sa BBL.
- Latest