Bilihan ng mga paputok sa Divisoria sinalakay
MANILA, Philippines – Nasopresa ang mga vendors ng mga malalakas na paputok sa Divisoria matapos na salakayin sa pangunguna ni Manila Vice Mayor Isko Moreno, kamakalawa ng hapon.
Umaabot sa P30,000 halaga ng mga malalakas na uri ng paputok ang nakuha na mahigpit ring ipinagbabawal ng national government.
Ayon kay Moreno, ang mga tindahan sa Tabora-Recto at Tabora- Sta. Elena ang pinasok matapos na makatanggap ng report na nagbebenta ang mga ito ng mga ipinagbabawal na paputok.
Sinabi ni Moreno na mairaraos naman ang pagsalubong sa Bagong Taon na hindi na kailangan pa ang malalakas na uri ng paputok na maaaring makadisgrasya sa mga inosenteng sibilyan.
Bagama’t dapat pa ring ipagdiwang ang pagsalubong sa Bagong Taon sa kanilang mga bahay, kailangan lamang tiyakin na malayo ito sa kanilang bahay upang maiwasan ang anumang sakuna.
Hindi rin umano dapat na payagan ang mga bata na magpaputok lalo pa’t delikado ito sa sandaling maisubo.
Kaugnay nito, umapela rin si Moreno sa mga pulis na iwasang magpaputok kung saan kadalasang nagiging biktima ang mga inosenteng bata.
Maganda aniyang salubungin ang Bagong Taon kung walang buhay na mabubuwis.
- Latest