DOH nag-iikot sa mga ospital
MANILA, Philippines – Nagsimula nang mag-ikot ang mga Department of Health upang matiyak ang kahandaan ng personnel at pasilidad ng mga ospital.
Ang pag-iikot ng DOH ay bunsod na rin ng inaasahang pagdagsa ng mga mabibiktima ng paputok dahil sa pagsalubong sa Bagong Taon.
Sinabi ni Assistant Secretary Gery Bayugo, na bagamat target nila na bumaba ang bilang ng mga biktima ng mga paputok, kailangan pa rin ang paghahanda sa mga hindi inaasahang insidente.
Nakakalungkot lamang na hindi pa man sumasapit ang pagsalubong ng Bagong Taon ay pumalo na sa mahigit 70 katao ang nabiktima ng paputok nitong nakalipas na Pasko.
Bunsod nito, puspusan ang kampanya ng Department of Health( DOH) kontra sa “iwas paputok” .
Aniya, kapansin-pansin naman ang kahandaan ng mga binisitang ospital kung saan ang mga gagamitin umano sa pamputol (kung mayroon mang puputulin), mga panggupit ng buto at laman ay ini-sterilize na.
Gayundin aniya ang mga personnel ng DOH at mga emergency room ng mga ospital ay handa na rin.
Samantala, sinabi naman ni DOH Acting Secretary Janette Garin na ang bawat isang buhay ay mahalaga kaya’t kailangan ang maigting na pag-iingat sa pagsalubong sa Bagong Taon.
Aniya, mas paiigtingin pa nila ang kanilang kampanya sa pagbaba ng bilang ng mga biktima. Kailangan din aniya ang kooperasyon at tulong sa mga magulang sa paggabay sa kanilang mga anak.
- Latest