Mga bilangguan ipinapa-audit

MANILA, Philippines - Matapos mabunyag ang marangyang pamumuhay ng ilang mayayamang bilanggo sa New Bilibid Prison (NBP), pinapa-audit ni Sen. Nancy Binay ang lahat ng jail facilities sa bansa.

Ayon kay Binay ang marangyang lifestyles ng mga “high-profile convicts” ay senyales ng ‘incompetence’ ng mga jail officials.

Maliwanag rin aniya na walang “hands on management” ang mga opisyal ng NBP kaya pumapalpak ang sistema sa mga jail facilities.

Hindi rin aniya sapat na i-reshuffle lamang ang mga jail guars at opisyal ng mga pasilidad at dapat ay panagutin ang mga may kasalanan.

Mistulang sinisisi rin ni Binay si Justice Secretary Leila de Lima dahil bahagi ng kanyang jurisdiction ang mga detention facilities.

Dapat inuuna umano ni de Lima na tiyakin na walang anomalya sa kanyang mga nasasakupang ahensiya.

Pinuna ni Binay na noon lamang Disyemre 15 nagsagawa ng raid si de Lima gayong matagal na siyang nasa puwesto.

Mahirap aniyang isipin na hindi alam ng mga opisyal ang nangyayari sa loob ng NBP at dapat matagal na itong nasilip ni de Lima.