E-power ni PNoy ‘di palulusutin ng House bloc
MANILA, Philippines – Hindi nakumbinsi ni Energy Secretary Jericho Petilla ang Makabayan bloc na mabigyan ng additional authority si Pangulong Aquino para sa nakaambang power crisis sa 2015.
Ito ay sa kabila ng ginawang panggigisa ni Bayan Muna Rep. Neri Colmenares kay Petilla sa budget deliberation ng Department of Energy (DOE) sa Kamara na inabot ng hanggang alas-2 kahapon ng madaling araw.
Giit ni Colmenares, natapos ang budget deliberation ng DOE ay hindi pa rin naipapaliwanag ni Petilla kung bakit obsessed ang gobyerno na bigyan ng emergency powers ang Pangulo.
Sa tingin ng kongresista, walang pangangailangan para bigyan ng dagdag kapangyarihan ang Presidente dahil hindi magkukulang ang supply ng kuryente.
Base na rin umano sa 2013 figures ng DOE ang installed capacity para sa Luzon ay 12,790 megawatts, samantalang 11,469 megawatts ang dependable capacity habang ang peak demand ay 8,701 megawatts tuwing summer lalo na sa buwan ng Mayo.
Sa datos umano nito lumalabas na mayroong 2,700 megawatts na reserved capacity na sobra sobra pa sa 400 megawatts na sinasabi ni Petilla na inaasahang kukulangin sa summer ng 2015.
Giit ng Makabayan bloc hindi sila papayag na basta makalusot sa Kongreso ang additional authority para sa Pangulo.
- Latest