12.1 M Pinoy mahirap pa rin - SWS
MANILA, Philippines - Umaabot sa 12.1 milyong pamilyang Pilipino ang naniniwalang sila ay naghihirap.
Batay ito sa latest survey na ginawa ng Social Weather Stations (SWS) noong nakalipas na Hunyo 27 hanggang Hunyo 30 kung saan 55 percent ng kanilang tinanong na pamilyang Pinoy ay nagsabing mahirap sila.
Ang naturang bilang ay mas mataas ng 2 percent sa 53 percent ng may 11.5 milyong pamilyang Pilipinong naghihirap noong unang quarter ng 2014.
Bunga nito, lumalabas na halos 600,000 pamilya ang nadagdag na bilang ng mga mahihirap sa bansa sa loob lamang ng tatlong buwan.
Sa survey, may 41 percent naman ng mga tinanong na pamilya o 9 milyong pamilya ang nagsasabing halos wala silang makain.
Mas mataas ito kung ikukumpara noong unang quarter ng 2014 na umaabot sa 39 percent ang nagsabing hirap sila sa pagkain.
May 1,200 pamilyang Pilipino ang respondents ng naturang latest survey.
Ang resulta ng survey ay sa kabila ng pahayag ni Pangulong Aquino sa kanyang SONA nitong Lunes na may halos 2.5 milyong Pilipino na ang nakaalpas sa kahirapan.
Sa talumpati, matatandaang kasama sa mga ipinagmalaki ni PNoy ang Expanded Conditional Cash Transfer Program at ang pagbaba anya ng antas ng kahirapan. (Dagdag ulat ni Rudy Andal)
- Latest
