Parking fee sa mall, hotel, eskwelahan pinatatanggal

MANILA, Philippines – Isinusulong ng dalawang mambabatas sa Kamara na pagbawalan ang paniningil ng parking fee sa shopping malls, paaralan, ospital, hotel at iba pang establisyamento.

Nakasaad sa House Bill 4298 nina Cagayan de Oro City Rep. Rufus Rodriguez at Abante Mindanao partlylist Rep.Maximo Rodriguez Jr. na dapat ay maging libre sa publiko ang parking area kung tatangkilikin naman nila ang lugar.

Sinabi ni Rodriguez na pinagsasamantalahan ng mga may-ari ng mga gusali ang kanilang mga parokyano sa paniningil ng parking fee kahit na tinatangkilik naman nila ang kanilang lugar.

Ilang malls ang naniningil ng P45 hanggang P50 para sa buong araw na paggarahe, habang ang iba ay P40 para sa unang tatlong oras at may karagdagang halaga na sa bawat oras na makokonsumo.

“There is a need for us to regulate the imposition of parking fees by all establishments, whether public or private, thereby making it free of charge if proven that the person has made a purchase or have availed of the services provided by said establishment, as evidenced by his receipt or the proper validation,” wika ni Rodriguez.

“Otherwise, the establishment can charge the consumer with high parking fees considering that he simply used the parking space without patronizing the establishment.”

Kung sakaling tuluyang maging batas ay pagmumultahin ng P100,000 ang may-ari ng gusali para sa bawat sisingilin nilang mga sasakyan.