Yolanda death toll umakyat pa

MANILA, Philippines -  Limang buwan matapos manalasa ang bagyong "Yolanda" sa Visayas, muling naglabas ang state disaster response agency ngayong Huwebes Santo ng bilang ng mga nasawi.

Ayon sa pinakabagong situational report ng National Disaster Risk Reduction and Management Council (NDRRMC) umabot na sa 6,300 ang nasawi sa pinakamalakas na bagyo sa kasaysayan ng bansa.

Pitong bangkay pa ang narekober ng mga awtoridad sa Tacloban City, habang nasa 1,061 pa rin ang nawawala.

Higit tatlong milyong pamilya o 16 milyong katao naman ang naapektuhan ni Yolanda mula sa Regions 4-A, 4-B, 5, 6,7, 8,10, 11, at Caraga.

Mula sa naturang bilang ay 890,000 pamilya o higit apat na milyong katao ang nawalan ng tirahan.

Tinatayang aabot sa P90 bilyon ang halaga ng mga nasirang ari-arian.