PSN Bansa ( Leaderboard Top ), pagematch: , sectionmatch: 1

Al-Qaeda terrorists nasa Metro Manila na

Nakapasok na umano sa Metro Manila ang mga teroristang al-Qaeda at ilan sa mga ito ay nagsasagawa na ng intelligence operations sa mga mahahalagang instalasyon ng pamahalaan.


Ayon sa isang senior NBI agent na tumangging magpabanggit ng pangalan, nakatanggap sila ng intelligence report na ilan sa mga suspected terrorists ay nasa Maynila na at hinihinalang nakapagtayo na ng kanilang komunikasyon at inuumpisahan na ang pag-espiya.


Bagamat tumanggi ang source na sabihin kung ilan at kailan dumating sa Maynila ang mga umano’y terorista, sinabi nito na sila’y "sinanay" ng al-Qaeda sa ilalim ni Osama bin Laden.


Bunga nito, inalerto na ang local intelligence community kasabay ng pagpapadala ng mga agent para magsagawa ng counter-surveillance operations.


Ang report ay kasunod ng pagkakaaresto ng tatlong kalalakihan sa Zamboanga City na sinasabing kaalyado ni Osama bin Laden at pinagsususpetsahang nasa likod ng bombings sa nasabing siyudad noong nakaraang Linggo.


Nitong Martes, naaresto ng pinagsanib na mga puwersa ng NBI at police agents sa Zamboanga City ang mga suspek na sina Marvin Johnson, alyas Abdul Malik; isang Jamil, at isang Jamal.


Nakuha kay Johnson ang listahan ng mga gusali na hinihinalang target na pasabugin, kabilang ang mga malls, mga simbahan at mga palengke, isang directory ng suspected al-Qaeda terrorists at explosive chemicals, electronic devices, detonators at cellphones.


Ayon sa report, si Johnson ay isang lisensiyadong chemical engineer at graduate ng University of the Philippines noong 1996.


Samantala, pinatindi pa ng NBI ang paghahanap nito sa iba pang pinagsususpetsahang mga miyembro ng al-Qaeda network na naka-base sa Zambonga City.

PSN ( Article MRec ), pagematch: 1, sectionmatch:
  • Follow Us: