RoRo pa-Indonesia bubuksan

MANILA, Philippines - Ilulunsad nina Pa­ngulong Rodrigo Duterte at Indonesian President Joko Widodo sa darating na Abril 30 (Linggo) sa Davao City ang RORO (Roll-on Roll-off) routes mula Davao-General Santos City-Bitung, Indonesia.

Ikinatuwa ni President Widodo ang pagkakaroon ng ferry service na mag-uugnay sa Pilipinas at Indonesia.

Kabilang ito sa nilagdaang kasunduan na sinaksihan nina Duterte at Widodo kahapon sa Malacañang.

Bukod sa ferry service na ito ay nagkaroon din ng Memorandum of Understanding (MOU) sa pagitan ng Pilipinas at Indonesia sa agricultural cooperation.

Nagpasalamat naman si Pangulong Duterte sa Indonesia sa patuloy na pagsuporta nito sa peace process sa Mindanao habang kinilala naman ni Widodo na isang mahalagang kaibigan at partner ang Pilipinas ng kanilang bansa.

“Philippines is a good friend of Indonesia and one of our great partners. We agreed to strengthen people to people relation,” sabi ni Widodo sa joint statement nila ni Duterte.

Dadalo rin si Widodo sa 30th ASEAN Summit ngayon sa Philippine International Convention Center (PICC) kasama ang ibang head of states na miyembro ng samahan sa rehiyon.