Triathlon festival himuon karon sa Sta. Fe

CEBU, Philippines - Bagang panon sa mga Sugbuanong triathletes, runners, cyclists ug swimmers ang moasdang balik sa isla sa Bantayan alang sa usa ka triathlon festival nga giulohan og “Tri-X” karong adlawa didto sa Santa Fe Beach Club.

Sugdan ang kumbati pinaagi sa 60 ka kilometro nga lumba sa bisikleta sa alas-5:30 sa buntag. Human niini ipahigayon ang duha ka kilometro nga open water swimming competition nga gitawag og oceanman.

Pagasundan kini sa triathlon sa alas-10 sa buntag diin ang mga partisipante mahimong mogamit og road bike o mountainbike.

Kadtong mosakay sa road o tri bikes magsubay og rota nga naglangkob og 2K swim, 60K bike ug 15K run, samtang kadtong mogamit og mountainbike mobanat og 1K swim, 30K bike ug 7.5K run.

Tapuson ang tibuok adlaw nga karera pinaagi sa usa ka sunset run nga dunay 5K ug 10 category.

Ganting salapi, tropeyo ug medalya ang nagpaabot sa mga mananaog. (BANAT NEWS)