Power 40 sugod na

CEBU, Philippines - Sugdan na karon  ang tinuig nga liga sa Power Forty Ballclub  diin unom ka teams ang mag-ilog sa kampiyonato diha sa Inayawan  Sports Complex.

Unang mopakita’g aksiyon  ang   Water Market diin ilang harungon ang Tony & Edgar sa alas-8 sa buntag. Sundan sa sangka tali sa Team Atillo ug Park & Go sa alas-9:30 ug dayon   Bob & Chino batok Team  Carbonilla  inig  alas-11.

Mosubay sila og single  round robin format sa elimination round.

Ang top two teams awtomatik nga moabante sa semifinals, samtang ang nahabiling upat ka koponan magtigi sa tagakay nga quarterfinals. Ang no. 3 moharong sa no. 5, samtang ang no. 4 mobatok sa no. 6  . Ang mga modaog maoy mokompleto sa semifinal cast nga magsangka alang sa duha ka luna sa finals.

Ang liga nahimo pinaagi sa paningkamot ni El Presidente Dome Labalan inabagan ni league organizer Vez Eleguin. Ang mga duwa pagadumalaon ni commissioner Edwin Dejacto Sr. (BANAT NEWS)