Durano ug Meca supak sa pagtudlo og opisyales

CEBU, Philippines - Ubay-ubay na ang mipadayag sa ilang pagsupak sa pagtudlo og mga barangay opisyal, ang labing bag-ong mipadayag mao sila si Kongresista Ramon "Red" Durano VI sa ika-limang distrito sa Lalawigan sa Sugbo ug ang pangulo sa  Cebu Provincial Anti-drug Abuse Office (CPADAO) Ivy-Durano Meca.

Matud ni Durano nga naa kita sa demokrasya nga nasud diin ang opisyales sa barangay gipili gyud sa katawhan.

"Kung mao na iyang gikahadlukan, my opinion is let the people know who are these barangay officials so that the people will know and whether they should be elected into office or not," matud pa ni Durano.

Dili sab pabor si Meca kay matud pa, anaa sa katawhan ang pagbuot kun kinsay ilang pilion ug kun nagproblema ang presidente sa pagkalambigit sa mga opisyal sa barangay sa ilegal nga drugas, anaa ang Barangay Anti-drug Abuse Council (BADAC) nga nakaila kun kinsa kadtong nalambigit sa ginadiling drugas sa ilang lugar.

Dugang niini, nga gawas sa problema sa drugas, aduna pay laing aspeto nga angay sulbaron sa mga kapitan. Ug dili sab angay i-generalize ang tanang barangay officials sanglit adunay uban nga sinsero sa ilang trabaho. Mitchelle L. Palaubsanon ug Le Phyllis F. Antojado (BANAT NEWS)