Simbolo sa kadatu

Kusog ang negosyo sa magtiayong Celso ug Nova. Sarisari store sa daplin sa karsada sa baryo Tilabog ning dakbayan. Nag-abang ra sila ining balay nga gihimo nilang tindahan. Sulod sa 10 ka tuig, nakapalit na sila’g ilang kaugalingong house and lot. Apan wa lang gihapon nila puy-i. Gipaabangan. Kay nalingaw man sila’g puyo ining ilang tindahan nga kusog ang suhot sa kuwarta. Wa lang sila’y  suwerte sa kaminyuon. Kay wa sila tugahi og anak. Mga pag-umangkon na lang nila ilang gitabangan. May gigastohan sila sa pag-eskuyla.

Unya nagmanya si Celso sa iyang kapikas nga magpalit sila’g sakyanan. Dili unta gusto si Nova kay wa may kamao modrayeb nilang duha. Apan namugos si Celso kay siya ang magtuon og drayeb. Nipalit sila’g second hand nga Jiffy. Gipahimudsan lang og padagandagan sa ilang mga higala ug paryente. Nakat-on si Celso og maneho. Apan dili gihapon gustong modrayeb. Kay wa gihapon nawala iyang pagkanerbiyoso kun naa nas driver’s seat. Makadrayeb lang siya kun may haniting modrayeb sa iyang tupad nga magbantay kanunay sa iyang sayop.

 “Tan-awa Dong Celso. Ang butang natong balor og P100,000, nagyaka na lang. Naghulat kun anus-a madunot”, ni Nova usa ka buntag nga nagpanglili sa jiffy nga napuhaw na ang pintal. “Status symbol man god na sa tawo. Dili man ta ilhong datu kun way sakyanan”, ni Celso. “Binuang man nang status symbol. Gusto diay kang ilhong datu?” ni Nova. “Bitaw! Ato na lang nang ibaligya. Bisa’g minus na lang ang presyo. Kay sa madunot lang na diha,” ni Celso.

“Sakto gyud ka. Nagbasol hinuon kong nagpapalit og sakyanan,” ni Celso. “Ay na lang pagbasol. Total, nalingaw man sab ka’g sakaysakay ana sa pagtuon nimo’g drayeb”, ni Nova. “Na hala, ato lang unya nang ipa-car wash. Unya butanga’g marka nga for sale”, ni Celso. Alcea Maningo - Cangyan, Carmen, Cebu