Nietes mihimo’g impresyon sa public workout

CEBU, Philippines - Mipahigayon og public workout  si Pinoy boxing legend Donnie ‘Ahas’ Nietes uban sa duha ka sumusulbong nga bitoon sa ALA Gym nga si Mark ‘Magnifico’ Magsayo ug Jeo ‘Santino’ Santisima niadtong Domingo sa gabii didto sa SM City Cebu.

Si Nietes maoy mobida sa Pinoy Pride 40 diha sa Waterfront Cebu City Hotel and Casino karong Abril 29.

Ang tulo ka dekalibreng boksidor nagpasingot og maayo gamit ang nagkadaiyang pamaagi nga gikahimuot kaayo sa bagang panon sa mga fans nga naglinya sab dayon aron magpakuha og hulagway uban sa ilang mga idolo.

Si Nietes (39-1-4, 22KOs) nga naghari isip WBO champion sa minimumweight ug junior flyweight sa milabay’ng 10 ka tuig, nangambisyon nga moangkon sa ikatulo niyang world title sa lain nga dibisyon sa dihang iyang sangkaon si Thai contender Komgrich Nantapech (22-3-0, 15KOs) alang sa IBF flyweight title.

Sa undercard, ang wa’y pildeng si Magsayo (15-0, 11KOs) makigharong ni Tanzanian Issa Nampepeche (24-7-4), samtang si knockout artist  Santisima (12-2, 11KOs) makigbinukbukay ni Master Suro (11-8-1) sa Indonesia. (BANAT NEWS)