Pusong Ligaw napildi

CEBU, Philippines - Wala katandog ang bag-ong serye sa ABS-CBN nga Pusong Ligaw ngadto sa kaatbang niini nga serye sa GMA-7 nga Ika-6 Na Utos.  Base sa Nationwide Urban Television Audience Measurement (NUTAM) data sa AGB Nielsen, ang Pusong Ligaw nakakuha lang og  6%,  samtang ang Ika-6 Na Utos nakaangkon og  8.9%.  Ang Pusong Ligaw gibidahan nila ni Beauty Gonzales ug Bianca King.

Nag-prenup sa Ethiopia

Fresh gikan sa bakasyon sila si Coleen Garcia ug Billy Crawford. Nanuroy ang  manag-uyab sa  Ethiopia. Gipaniguro gihapon nila nga dili mabiyaan ang ilang pagpangandam sa ilang kasal nga mahitabo na gyud sunod tuig. Ang duha nag-prenup shoot dapit sa baybayon ug sa mga bukirang bahin sa maong maanindot nga dapit.

Todo pangandam

Nagplano karon si Megan Young nga mo-enroll og summer workshop sa Amerika.  Kabahin kini sa iyang preparasyon sa hingpit na niya nga pagsulod sa Hollywood.  Gusto ni Megan nga mabaid ang iyang abilidad sa pag-arte.Dili pa lang dugay,nipirma ang beauty queen og lima ka tuig nga kontrata sa Innovative Artists Agency sa New York.

Kaslon na

Sekreto nga gipahibalo ni Scarlet Snow pinaagi sa pagpadala og text message sa mga higala sa iyang ginikanan nga sila si Hayden Kho Jr. ug Vicki Belo nga magpakasal na kini karong Setyembre sa Paris. Wala gibutyag kun kinsa ang mga motambong puhon apan gipasalig ni Scarlet nga mga suod nga higala ug ang ilang pamilya ang motambong sa maong selebrasyon.

Daniel gisurprisa

Giandaman gyud og surprise birthday party si Daniel Padilla gikan sa iyang inahan nga si Karla Estrada, mga suod nga higala sa showbiz ug mga barkada sa Manila Private House sa Taguig niadtong Lunes. Present usab sa pagsurprisa ang rumored girlfriend niya nga si Kathryn Bernardo. Karong adlawa ang ika -22 nga adlaw'ng natawhan ni Daniel.

Nagkampiyon sa triathlon

Naangkon ni Matteo Guidicelli ang unang pwesto sa Xterra Danao 2017 Off-Road Triathlon Series sa Danao, Cebu. Nalakip si Matteo sa grupo nga FORZA kinsa nagmadaugon usab sa maong lumba.

Deactivated

Temporaryong gi-deactivate ni Andi Eigenmann ang iyang Twitter Account gumikan kay gikapoy siya og tubay ni Jake Ejercito. Dugang pa niya nga dili usab kini makaayo sa iyang anak nga si Ellie.

Angel ngadto kang Neil: “You made my day extra special”

Gipadayag sa Kapamilya star nga si  Angel Locsin ang iyang tim-os nga pagpasalamat ngadto sa film producer nga si Neil Arce kinsa mipatim-aw gyud sa iyang ika-32 nga adlaw'ng natawhan.

Kahinumdoman nga na-link ang duha human sila spotted nga nag-date sa Hongkong niadtong Semana Santa.

Sa Instagram post ni Neil, gipakita niya ang hulagway nilang duha atol sa ilang pagsaulog sa birthday ni Angel sa usa ka restaurant sa Pasig City. Gani, aduna usab kini pakapin nga mensahe.

Sa maong mensahe, gipasabot ni Neil nga naghinam-hinam na siya sa mga umaabot nga panghitabo tali nilang duha.

Mi-reply usab si Angel nga puno usab sa pasalamat. Dugang pa nga wala makalimot og paabot si Angel sa mga mabulukong pulong alang kang Neil  nga : "You made my day extra special". (BANAT NEWS)