Pasok sa listahan

CEBU, Philippines - Nahimutang si Marian Rivera sa ikaduhang puwesto sa listahan sa Esquire-Indonesia  sa  Top 7 Sexiest Asian Women in the World. Nakatigi  ni Marian ang mga lig-ong  personalidad   sa Asya.

Paolo ug Derek suwayan

Mag-uban sila si Paolo Ballesteros ug Derek Ramsay sa umaabot nga action-comedy movie sa Regal Entertainment. Nipirma og kontrata si Paolo sa Regal niadtong Miyerkules.

Nagpungasi ang proyekto

Maglisod og dawat si Joross Gamboa sa proyekto nga gitanyag sa ABS-CBN ngadto kaniya  gumikan kay busy pa siya sa mga show niya sa GMA-7 nga naglangkob sa Encantadia ug Full House Tonight. Mapasalamaton si Joross sa mga network nga nisalig sa iyang talento.

Busy sa negosyo

Tungod sa ka-busy sa iyang mga negosyo, wala pa masulod sa hunahuna ni Marvin Agustin nga magminyo.   Wala pa’y uyab ang aktor busa dili pa siya segurado kun masudlan ba niya puhon ang kalibutan sa kaminyoon.

Juday nagpa-slim

Todo workout si Judy Ann Santos  gumikan kay ganahan na gyud siya maibanan ang iyang timbang.  Nasayran nga nag-anam anam na og ka-sexy og balik si Juday.

Gil na-pressure

Giangkon sa leading man ni Jennylyn Mercado sa  My Love From The Star nga si Gil Cuerva nga na- pressure gyud siya sa pagsulod sa showbiz.  Todo adjust si Gil sanglit usa man siya ka modelo ug wala siya maanad nga moarte atubangan sa kamera. Hinuon hinay-hinay na nga nakat-on si Gil gumikan sa lapad nga workshop.

Pakpak kang Janine!

Napuno sa mga pagdayeg ang nadawat ni Janine Gutierrez gumikan kay nahatagan gyud niya og hustisya ang role niya isip buta sa seryeng Legally Blind. Gipamatud-an sa aktres nga usa siya sa mga importanteng artista sa GMA-7 karong panahona.

Hugyaw gift

Nasurprisa  si Jaya sa  birthday gift nga iyang nadawat gikan sa iyang higala nga si  Regine Velasquez.  Usa kini ka  Gucci nga sandal nga gibanabana nga mobalor og  $695 o dul-an sa  P35,000. Suod gihapon ang duha bisan pa man nga dili sila susama og network nga gitrabahoan.

Panaghigalaay gipabilin

Nasigpatan ang kanhi mag-uyab nga  sila si  John Lloyd Cruz ug Angelica Panganiban sa birthday party ni Julia Montes sa miaging gabii.   Si Angelica ang nag-organisa sa maong party.

Sarah nahimuot

Nahimuot pag-ayo si Sarah Geronimo sa resulta sa usa ka online survey kun diin nag-una siya sa mga aktres nga angayan mohulip kang Angel Locsin alang sa role nga Darna. “Gusto ninyo bang makakita ng Darna na naka-jumpsuit?,” nag-katawang reaksyon ni Sarah.  (Sanden J. Anadia)

Ka-sexy ni Maja milutaw

Mainitong gisugat  ni Maja Salvador   ang  summer   pinaagi sa pagkaligo og dagat ug gi-post dayon niya sa Instragram ang iyang sexy photos.

Wala’y pugong-pugong nga gisul-ob ni Maja ang bikini  samtang nagpahayahay  sa baybayon.

"Happy mind. Happy life," suma pa sa Instagram post sa aktres. Makita sa hulagway ang sexy nga kurbada sa lawas ni Maja ug mapasalamaton ang aktres nga iyaha kini nga namintina. Nidalikyat si Maja sa pagpahayahay luyo sa ka-busy sa taping sa serye niya nga Wildflower.

Noven gikagubtan Negros

Kapin sa 12,000 ka mga tawo ang nagpunsisok  sa homecoming  sa Tawag ng Tanghalan winner nga si Noven Belleza didto sa Negros Occidental sa miaging adlaw. Pag-abot pa lang sa airport, gikagubtan na si Noven ug gisunod dayon ang caravan paingon sa hometown niini  sa Victorias City kun diin gihimo ang homecoming program. Nidalit si Noven sa mga tawo sa winning song niya nga Air Supply medley ug nisamot pag-abiba ang mga tawo kaniya. Nibalik dayon si Noven sa kaulohan aron mangandam sa subli niya nga paglugwa sa ASAP karong Domingo.  

Alex naluwas sa car accident

Nabangga ang sakyanan nga gimaneho ni  Alex Medina sa  Quirino Highway, Novaliches, Quezon City  pasado  alas-4  kagahapon sa kadlawon.

Suma pa sa video nga  gi-post ni  Alex sa Facebook, duna siya’y  nasundan nga sakyanan  kun diin suwaw kaayo og suga  hinungdan nga nisuway siya og  overtake niini.  Tungod sa kangiob sa lugar,  wala nakabantay ang aktor  nga duna’y ali ang  karsada hinungdan nga nabangga  ang iyang sakyanan. Mapasalamaton si Alex sa Ginoo gumikan kay wala gyud siya nakabaton og samad ug garas sa iyang kalawasan  bisan pa man nga puwerting gubaa  ang atubangang  bahin sa iyang sakyanan.

“Home at last. It’s true what they say near-death experiences can really change your outlook.Salamat sa lahat ng nag-send ng well wishes. Salamat papa God sa tulong mo at salita.Dami ko na-realize today na might've changed something in me. Oh yeah and ingat kayo sa Quirino highway, literal na highway to hell,” suma pa sa Facebook post sa aktor.  (BANAT NEWS)