EDITORYAL - Peligro ang LPG sa lata

Bisan unsang butang nga gamitunon kaayo sa tawo, basta barato gani, paliton gyud tungod sa pangyawat nga makamenos sa gastos. Apan usahay mao kini ang makamugna og mga disgrasya, sama niining mga butane stove nga milyones pesos na nga kantidad sa kabtangan ang nawala tungod sa sunog. Mahal ang gas stoves ug ang LPG nga gamiton pagpasiga niini aron makaluto. Mahal usab ang kerosene stove nga de bomba, bisan ang uling karon tag P15 ngadto sa P30 ang matag putos. Mao kini nga daghang tawo ang nangita og baratuhon apan epektibong gamiton. Apan ang baratuhon dali ra maguba, ang lig-on mahal.

Nanggawas karon nga butane portable stoves na ang gigamit sa kadaghanan sa mga Pilipino nga nagpuyo sa siyudad. Apan kini gidesinyo para sa outdoors, o gamiton lang unta sa gawas sa balay. Ang orihinal gyud nga butane–filled canisters mokantidad og kapin P50 ang matag lata, ug sagad anha lang mapalit sa mga dagkong tindahan. Ang desinyo niini kausa ra gamiton, ang pasabot ilabay na kini kun mahurot ang sulod. Apan adunay pipila nga mga kiat og hunahuna nga nag-refill karon sa mga iglalabay na nga mga lata sa butane, apan LPG ang ilang gisulod kay mas dali kining pangitaon, itandi sa butane.

Ang Department of Energy miingon nga peligro ang LPG kay kusog modakop og kayo ug kining mga lata sa butane gidesinyo nga kausa ra nga gamiton mao nga nipis ra kaayo ug dili niini kaya nga pugngan ang pressure sa LPG aron dili moulbo. Ang uban sa mga refilled cans sa butane gipangtaya na. Hagbay ra nga nagsige og pahibalo ang DOE ug kabomberohan nga peligro gamiton ang LPG-filled canisters nga gi-recycle. Busa awhag nila sa katawhan nga dili mangyawat aron dili magmahay sa kauwahian.