EDITORYAL - Transfer station

Ang mga konsehal sa Dakbayan sa Sugbo nga alyado ni Mayor Tomas Osmeña mipadayon gyud sa ilang tinguha pagpalabang og ordinansa nga magtugot sa paggamit og usa ka ektaryang luna sa karaang sanitary landfill sa Barangay Inayawan aron himoong transfer station sa mga basura.

Kining lakang ni Konsehal Eugenio Gabuya Jr. daan na nga gisupak sa mga konsehal nga alyado sa Team Rama, ilabi na ni Konsehal Joel Garganera, nga miisip sa tinguha ni Gabuya nga kwestiyonable ug wala masubay sa kamandoan sa Court of Appeals nga nagdili sa mga opisyal sa siyudad paggamit sa Inayawan landfill.

Mga politikanhong tigpaniid sa City Hall nakabantay nga ang agresibong tinguha karon sa mga alyado sa Bando Osmeña Pundok Kauswagan (BOPK) naggumikan kay panahon nga hukman na ang pagpasar sa ordinansa, sayon ra kaayo alang kanila kay ang BOPK gilangkoban na man og siyam ka konsehal.

Apan ang isyu nga angay’ng mahibaw-an kun makaayo ba sa katawhan ang pagpagahin og usa ka ektaryang yuta sa Inayawan landfill? Ang transfer station mao ang dapit nga anha ihuwad ang mga basura, ug pilion kadtong mga madugta ug ang dili madugta, sa dili pa hakuton paingon sa landfill.

Pagka karon, ang pribadong tighakot sa mga basura nga gisuholan sa siyudad, migamit og pribadong transfer station diha sa Inayawan, ug ilang gibayaran. Sa ato pa, kun ang mga basura adto na hakuton sa transfer station nga gipanag-iya sa siyudad, menosan na usab ang bayad sa matag tonelada nga basura nga mahakot sa private hauler.

Kun ingon niini ang sitwasyon, dili maayong supakon kining gisugyot nga ordinansahon ni Konsehal Gabuya ug gisuportahan sa ubang mga konsehal nga alyado sa BOPK.