EDITORYAL - U-turn ni Duterte

Gimandoan ni Presidente Duterte ang militar sa pag-okupar sa tanang siyam ka  isla, o kun unsa pa’y mga isla nga salin sa China nga pabiling anaa sa kontrol sa Pilipinas diha sa West Philippine Sea. Ang pagsabot ni Duterte sa West Philippine Sea, nga sa makauna lang pagtarok og estraktura ug wala kini buhata sa Pilipinas.

Ang Pilipinas aduna gyuy mga isla nga giokupar sa WPS, sama sa Pag-asa Island nga sakop sa lungsod sa Kalayaan Group of Islands (KIG), apan kasagaran niini wala’y nagpuyo, gawas lang sa mga sundalong gipabantay didto. Ang China wala mahasol pagpangita og isla sa WPS, naghimo sila og kaugalingong isla diha mismo tupad sa Pagasa.

Mas lapad pa gani ang ilang gi-reclaim, kun itandi sa tanang mga natural nga mga isla sa WPS. Maisip gyud nga militarisasyon ang ilang gibuhat bisan unsaon pa nila og limod. Nakomplikado ang kaniadto kasungian sa Vietnam, Malaysia, Taiwan ug Pilipinas tungod sa pagsulod sa China isip usa sa mga claimants kay dili lang usa ka bahin ang ilang gusto, kun dili, ang tibuok gyud WPS nga gitawag og South China Sea.

Gusto ni Duterte nga pabutangan og mga estraktura kining maong mga isla agi’g pagpakita sa hugot nga pagbarug sa Pilipinas sa katungod niini sa maong teritoryo.  Siguro adunay nakahatag og tukma nga pagpasabot bahin sa WPS kang Duterte, hinungdan sa kalit niya nga pag U-turn sa una niyang tratamento sa isyu. Bisan og dili pa angkunon, matawag nga militarisasyon ang buhaton ni Duterte ug posibleng   masuko ang ubang claimant countries, ilabi na ang China.

Kun gibuhat kini sa China ug sa ubang mga nasud, nganong dili man mahimong buhaton sa Pilipinas?  Kun si PNoy nisukol pinaagi sa korte, si Duterte niparang sa pisikal nga pamaagi. Kinahanglan lang nga suportahan si Duterte kay mao man ni ang gipangita nato sa atong mga lider, ang mobarug alang sa katarungan.