EDITORYAL - Dili patas nga pagtagad

Gidestino na ni Mayor Tomas Osmeña si SPO1 Adonis Dumpit didto sa ospital aron bantayan si Ephraim Nuñal nga biktima sa pagpamusil ni David Lim Jr.

Natan-aw sa mayor nga dili gyud patas ang gihimo sa kapolisan kay si Lim Jr. gipabantayan og daghang sakop sa Special Action Force (SAF) didto sa gibilanggoan kaniya apan ang polis nga gidestino pagbantay ni Nuñal didto sa ospital, walay armas.

Kun balansehon pag-ayo, si Lim dili na gani unta angay nga bantayan pa og SAF kay anaa man siya nabilanggo sa kampo sa kapolisan. Mahimo tingali nga bantayan siya kun dad-on siya sa piskaliya o kaha hukmanan.

Dili malalis nga adunay special nga pagtagad nga gihatag sa batan-ong Lim kay bisan og naghuot og piniriso ang laing selda sa Camp Sotero Cabahug, apan walay laing binilanggo nga giipon sa selda nga gibutangan kang Lim.

Gani, adunay nakakita nga sa wala pa moabot si Lim, gipalimpyohan na pag-ayo ang selda nga dili sagad buhaton kun ordinaryo nga mga tawo ang ibutang aron tanggongon samtang magpaabot nga mapasaka ang kaso sa hukmanan.

Dinhi makita sa publiko ang double standard nga bisan sa bilanggoan, ang adunahang tawo nga mapriso, makaangkon gihapon og bentaha kay sa ubang piniriso nga pobre. Husto ang gihimo ni Osmeña nga gipabantayan gyud niya kang Dumpit ang biktima sa pagpamusil ni Lim.

Pinaagi niini, makontrolar ang mga tawo nga moduol sa biktima ug posible nga ang uban kanila nagplano paghimo og dautan, sama sa pagpanghadlok aron nga si Nuñal dili na modayon sa pagpasaka og kaso batok ni Lim.

Tukma usab ang pahimangno sa mayor ngadto kang Nuñal nga kun makagawas na siya sa ospital, doblehon gyud niya ang iyang pagbantay kay dili basta-basta nga pamilya ang iyang gikakontra.

Swerte kaayo si Nuñal kay kun wala pa mangusog si Osmeña nga magukod si Lim nga maoy mipusil kaniya, mahimong walay hustisya nga iyang maangkon.