Earth Hour 2017 karong Sabado

CEBU, Philippines - Ang kagamhanan sa Siyudad sa Sugbo maoy mo-host sa Earth Hour 2017 sa Plaza Independencia karong Sabado, Marso 25.

Usa ka kalibutanong kalihukan ang Earth Hour nga giumol sa World Wide Fund for Nature (WWF) ug nag-awhag sa mga indibidwal, komunidad, patigayon ug uban pa nga pawngon ang suga sulod sa usa ka oras gikan sa alas 8:30 hangtud alas 9:30 sa gabii.

Kini ang labing unang higayon nga ang siyudad mo-host sa kalihukan pinaagi na sa pagpakig-alayon sa pribadong sektor ug non-government organization nga nagpakabana sa climate change.

Usa sa mosalmot sa kalihukan mao ang Sanlakas diin sigun sa ilang secretary-general, Teody Navea, nga sa dili pa sila moadto sa Plaza Independencia, usa una ka kalihukan ang ilang ipahigayon diin ang ilang speaker mao si Cebu Archbishop Jose Palma.

Ilang tukion ang planong pagtukod og coal-fired power plant sa Barangay Sawang Calero nga ilang gisupak.

Matud sab ni kanhi konsehal Nida Cabrera, over-all chairman sa Earth Hour 2017, nga magsugod ang kalihukan sa Plaza Independencia alas 7:30 ug isunod dayon ang usa ka oras nga switch-off.

Gipasabot ni Cabrera nga importante gyud ang maong kalihukan aron makatabang sa suliran sa climate change nga giatubang karon dili lang sa Pilipinas apan lakip na sa ubang nasud.

Subay niini, si Konsehal Eugenio Gabuya ug Konsehal Mary Ann delos Santos nipasalig nga siyento porsiyento nilang suportahan ang Earth Hour 2017.

Matud ni Gabuya nga ang siyudad nitagana og pundo nga P80,000 alang sa kalihukan gikan sa city-sponsored activities ug aprobado ni Mayor Tomas Osmeña.

Samtang matud sa grupong Habagat kinsa partners sa siyudad nga dugay ra nilang gusto makig-alayon sa siyudad ug dako sab og tabang kini tungod kay dili na sila maglisud sa pagkuha og mga permits ug uban pa. Human sa switch-off isunod dayon ang night bike rides nga gibana-banang salmutan sa dul-an 4,000 ka bikers diin ilang subayon ang unom ka kilometros nga rota.

Tungod kay gabii man, giawhag ang tanang bikers nga magsul-ob og kompletong gamit aron malikayan ang disgrasya sa kadalanan. Decemay P. Padilla ug Mitchelle L. Palaubsanon (BANAT NEWS)