DEPED: Graduation walay amotan
CEBU, Philippines - Subling nipahimangno ang pangulo sa Department of Education Cebu City Division nga walay amotan ang mga mogradwar nga tinun-an.
Si DepEd Cebu City Division Superintendent, Dr. Danny Gudelosao, nipagawas og memorandum base sa giluwatan sa ilang ulohang buhatan nga nagmando nga walay pagpaningil og koleksyon karong panahon sa graduation ngadto sa 127 ka tunghaan sa siyudad.
Giawhag ni Gudelosao ang katawhan ilabi na kadtong mga ginikanan sa pagtaho sa ilang buhatan sa higayon nga adunay maningil og koleksyon sa graduation.
Giingong way rason nga mangayo pa og amotan kay matag bata adunay budget nga P350 gikan sa DepEd ug subsidy gikan sa kagamhanan sa Dakbayan sa Sugbo.
Gitug-an sab ni Gudelosao nga mahimo ra nga dili magtoga ang mga mogradwar apan kun gustohon sa mga ginikanan nga magtoga ang mga bata, iya kining giawhag nga moderetso na lang ngadto sa mga nagpaabang niini.
Nipahimangno sab kini ngadto sa mga magtutudlo ug nagdumala sa mga pampublikong tunghaan nga ipabilin nga simple apan memorable ang selebrasyon sa graduation. (BANAT NEWS)
- Latest