FYI: “Buhakhakan” karong Pebrero 2
CEBU, Philippines — Mapuno sa kalingawan ang mahitabo diha sa Luyang Covered Court diha sa Carmen, Cebu alang sa “Buhakhakan ni Chang Euldan” karong February 2, 2018.
Suma pa ni Konsehal Chang nga gitapok gyud niya ang local talents aron maporma ang maong programa ug dako ang iyang pagsalig nga kagaton kini sa iyang mga konstituwente.
Mo-perform sa Buhakhakan mao ang labing una nga winner sa Sinulog Idol nga si Jacky Chang.
Naa usab ang ubang produkto sa Sinulog Idol, kini sama nila ni Dave Alcano, Danielle Orazaga ug Jan Echavarria.
Mopakita usab sa iyang hugyaw nga talento sa pagsayaw ang gold medalist sa World Championships of Performing Arts sa miaging tuig nga si Jesse Dan Barreto.
Aron mosadya og samot ang maong show, mo-perform ang Cebu Closet Dolls, Double Impact ingon man usab si DJ Mark.
Ang TV personality nga si Roy Empleo maoy mo-host sa maong programa. Nagkanayon si Euldan nga naandan na gyud niya sukad pa kaniadto nga modalit og libreng kalingawan ngadto sa iyang mga konstituwente.
- Latest