Wala magsilbi ang Super Ma’am?

Sanden: Hello mga Kabanatanay, kumusta na man mo uy, busy na man kaayo mo, labi na kang hampaslupa Jaypee nga nagkawagas ang lovelife ug kang Tita Yurs nga busy sa mga raket karong panahona. Mahuman na man diay uy karong Biyernes ang Super Ma'am ni Marian Rivera. Daghan ang naguol nga fans ni Marian, pero unsaon taman, basin diha ra gyud diay kutob ang script. Pero duna pu'y intriga nga matud pa wala gyud kini katumpag sa Probinsyano sa ABS-CBN. Pero para nako, dili kay nako feel ang serye nga i-extend og maayo busa okay raman seguro nga humanon ang Super Ma'am kay diha ra man gyud kaha kutob ang dagan sa istorya niini.

Jaypee:  Olah mga kabanatay, kumusta mong tanan pagkahuman sa Sinulog? Mareng Sanden unsay ayu kay atung gub- on? Beshie Yuri sorry ha, I love Marian pero unsaun taman. Klaro ug tataw nga wala gyud kini katumpag sa Probinsyano. So dapat na gyud siya tapuson. Kusug si Marian apan wala lang gyud tingali mauyuni sa masa ang istorya niini. Mas maayo nga ibalik na lang nila ang Amaya. O ba kaha, mas magmugna pa gyud og intense nga serye ang GMA  para ni Tiya Marian

Yuri: Helllloooo mga pinalanggang Kabanatanay! Congratulations sa GMA-7 Sinulog Live Coverage ug sa ilang bongga nga GMA Kapuso Float. Unya congratulations usab sa Yoyoso Philippines Sinulog Float nga Hugyaw pud kaayo. Kon mahuman na karung Friday ang Super Ma’am,  wala kaayo ko naguol kay ang tanan dunay katapusan. Ang  importante kay ang gihatag niini nga mensahe sa katawhan.  Sigurado ko nga dunay musunod nga project. So, I don’t care  labaw na nimo beshie Jaypee nga not so beautiful.

Sanden: Mao ba, Tita Yurs? So okay ra diay ka nga ingnon kang Jaypee nga bati ang istorya sa Super Ma’am hahaha. Ay da, wala gyu’y kahumanan ang problema ni Cardo (Coco Martin) maong makapuol kaayo. Uyon ra pud ko uy nga nahuman ang serye ni Marian para dili sad na maabtan og puol factor. Maayo gyud baya ang pagkadala ni Marian. Akong nadunggan ang Sherlock Jr. ni Ruru Madrid maoy ipuli sa Super Ma’am , hala katumpag ba kaha na ni Cardo? Haha.

Jaypee: Nanghinaot baya pod ko beshie Yuri nga ang Super Ma’am unta ang makabagnus sa ratings sa nagkapuol na nga Probinsyano. Pero asa naman? Wa man!  Lahi gyud diay gihapon ang dating niini sa katawhan. Manghinaut ko nga naa na pod untay maka line up nga serye para kang Marian  karong tuiga nga dunay linahi nga istorya aron motigi gyud og todo sa Probinsyano.

Yuri : Hoy silihan kuna imong baba diha Jaypee.  It doesn’t mean nahuman ang usa ka show, wala ka tay-og anang Probinsiyano. Humanon siya kay naay timeline ang Super Ma’am nga wala gituyok tuyok ang istorya. Dili boring ug sama sa akong giingon, duna’y nindot nga lesson ang nagpahipi niini.Nagtuo jud ko nga amiga ta, hahay.

Sanden: Sakto jud ka Tita Yuri, kapoy kaayo ang show nga magtuyok-tuyok ang istorya, Ayy da, ang importante nga nakahatag og kalingawan ang serye ni Marian. Basta ako, dili kaayo nako feel ang serye nga todo extend ra kaayo.  Sa akong nadunggan, wala pa gyuy schedule ang Probinsyano sa ilang final shooting, nagpasabot nga i-extend pa kini og taman.Dili rana maguol si Marian, kay daghan nana siya nga naagian, pila na ka serye niya kaniadto ang nagmalampuson. Pagkakita nako og pipila ka episodes sa Super Ma’am, maayo gihapon kaayo si Marian uy, dili gyud ko mapul-an sa iyang pag-arte. Sige uy, manghipos na ta sa atong baligya. Amping mga beshie.

Jaypee: Wa’y amiga- amiga kay dili ka gwapa Yuri. Regardless sa lesson nga makuha sa maong show, it is still business at the end of the day. Kay klaro man sad kaayo nga if ni- rate na siya, of course i -extend na og laing season. Ingun ana baya na ang kalakaran. Parang hindi kana nasanay Yuri. Look at Probinsyano, sa kataas sa ratings, sige gyud og adjust. Lumalaban gyud gihapon. So sa Super Ma’am nga matapos na karung Friday, thank you for all the lessons apan paet, kinahanglan na gyud tang manamilit.

Yuri: I love you Sanden, nakasabot ka sa akong gipasabot. Kining hinampak nga Jaypee  dugay kaayo kasabot . Ni- click ang Super Ma’am pero mahuman siya kay human na ang istorya. Period.