“Hakot Award” si Festival Queen!

CEBU, Philippines — Dili masukod ang kalipay nga gibati sa pambato sa Siyudad sa Talisay human niya nalangkat ang titulong Sinulog Festival Queen 2018 ug gikatigi niya ang laing 11 nga mga kandidata.

Si Shaila Mae Rebortera miangkon nga mura siya’g gibayaw sa langit sa iyahang kalampusan nga nakab-ot tungod kay wala siya nagdahom nga mapili isip Sinulog Festival Queen karong tuiga.

Matud pa niya nga dili sayon ang pagsalmot sa maong indigay tungod kay ang ubang kandidata nagpakita  pud og hugyaw nga  abilidad sa pagsayaw ug pagrampa aron mahatagan og dungog ang ilahang lugar.

Sa dihang nahinabi sa Banat News Hugyaw si Rebortera, mitug-an siya nga aduna siya’y naagian nga mga pagsuway samtang nagdagan ang adlaw sa wala pa ang judgment night  apan wala gyud siya mo-surrender

“Like the schedule for the practice, it was too hard because I am still studying; I have to balance my time. Just really balance my time and asked help from Señor Santo Niño,” matud pa niya.

Si Rebortera kasamtangang nagtungha isip   5th year student sa Cebu Doctors University sa kursong dental medicine .

Ang maong pagsuway iyahang gihimong kusog aron makab-ot ang kalampusan nga gipangandoy usab sa ubang mga kandidata.

Ang kadaugan nga iyahang nakuha, iyang gipahinungod ngadto sa mga Talisaynon nga nihatag gyud og pagsalig kaniya.

Dugang pa niya, mapasalamaton usab siya sa iyahang pamilya nga wala mobiya sa iyahang kiliran sa panahon nga nagkinahanglan siya og kusog nga mosalmot sa maong indigay.

Mitug-an si Rebortera nga una kining higayon nga misalmot siya sa Sinulog Festival Queen.

Ang maong indigay nga nahitabo niadtong Biyernes sa gabii, January 19, gisugdan og usa ka production number sa mga kandidata nga mirampa sa engrande nga bantawan sa Cebu City Sports Center inubanan sa Sinulog Festival Queen 2017 nga si Marla Pino Alforque.

Gawas sa titulong Sinulog Festival Queen 2018, napili usab siya isip Miss Novelino, Miss Skin Magical, Cignal’s Miss Awesome, Miss Air Asia, Miss PLDT, Miss Pioneer Adhesive, Miss SKYGO, Miss Magnolia Pambansang Manok, Mang Inasal Queen ug Miss Casino Femme.

Ang Sinulog Foundation Inc. Executive Director nga Ricky Ballesteros nisaysay nga nibilib ang corporate sponsors kang Rebortera tungod sa pagkamaayo niini motubag sa mga pangutana.

Ang korona karon nga gihuptan ni Rebortera sama gihapon sa miaging tuig nga gitawag og “Inang Dolly Crown.”

Ang maong korona gimugna sa inilang Cebuano designer sa tibuok kalibutan nga si Cary Santiago isip pasidungong sa nag-unang Sinulog Festival Queen nga si Dolores Suzara.

Sa laing bahin, napili nga 1st runner-up ang  rayna sa Tribu Katbalaugan, Catbalaogan, Samar nga si Mary Faith Libres  ug naangkon usab niini ang  Best in Group Presentation ug Best in Solo Performer.

Ang rayna sa Carcar City nga si Bianca Willemsen maoy napili nga 2nd runner up  uban sa special  awards nga Miss Flexi Finance ug Miss Lecit-E.

Napili pud nga 3rd runner-up  si Isabel Luche,  ang rayna sa Tribu Kandaya, Daanbantayan nga maoy napili usab isip Best in Festival Costume ug Best in Production. Nakuha usab niya ang titulong Miss Photogenic, Miss Grab ug Miss McSmile.

Ang designer ni Luche nga si Barry Luche maoy napili nga Best Designer. Kahinumduman nga atol sa photo shoot sa mga rayna, nag-viral ang festival costume ni Luche tungod sa mahugyawong desinyo niini nga nagpakita unsa ka maanyag ang kinaiyahan.

Samtang si Maerylle Blauta, ang kandidata sa Tribu Buyoganon, Abuyog, Leyte maoy 4th runner-up . Napili usab ang iyahang grupo isip Best in Musicality. Siya usab ang napili nga Miss Coca-Cola Swakto ug Sinulog app-user.

Si Ballesteros miingon nga karong tuiga, adunay bag-o sa Sinulog Festival Queen diin gihatagan og 60 segundos ang mga kandidata aron mapakita og unsa kaanyag ang ilahang lugar.