38th Cebu Pop: Awit Kabahin sa Kinaiyahan, Nangharos

CEBU, Philippines — Mapasalamaton gyud ang composer nga si Jay-Arr F. Librando human nangharos ang iyang entry nga nag-uluhan og Sugbuanon Ko sa ika-38 nga Cebu Pop Music Festival nga didto gipahigayon sa IC3 Convention Center niadtong Biyernes sa gabii .

Ang maong komposisyon nagtuki unsa kaanindot ang Sugbo ug ubos kini sa kategoriyang Garbo sa mga Bisdak.

Giangkon ni Librando nga ang pagmugna niya sa maong awit nagbase sa mga sugyot sa iyang mga higala ug sa iyang mga obserbasyon.

“Actually, paghimo nako aning kantaha kay nag-crowd sourcing sa gyud ko ug akong gi-gather tanan ug gihagpatan until nahimo gyud ni siyang kantaha”, suma pa ni Librando.

Milangkat ang maong komposisyon og duha ka espesyal nga mga pasidungog nga mao ang Best Music Video ug People’s Choice Award human kini nakaangkon og kapin sa 12,000 views sa  Youtube.

“It is a blessing. Mao nga dako gyud kaayo ko og pasalamat ni Señor Santo Niño kay siya gyud ang nakaingon aning tanan and working with Sheena was very easy,” matud pa ni Librando.

Ang  produkto sa Tawag ng Tanghalan nga si Sheena Belarmino maoy  interpreter sa maong awit.

“I know how she sings and kahibaw ko unsa siya kanindot mokanta. I’ve been also following her wherever she goes kay as one of her mentors, I’m one of her biggest fans. Paghimo nako sa kanta, ako gyud nga gi-design para niya,” matud pa niya.

Sa laing bahin, midaog usab ang awit nga “Ikaw Na” sa Awit sa Gugma category ug sinuwat kini ni  Neila Salarda.

“Grabe kaayo ang akong kalipay, salamat kaayo sa tanang nisuporta , ang maong song kay naghisgot  nga duna gyu’y forever . Nipahuway una ko anang mga maoy song.  Ako gyud nga gi-sure nga happy ang ending sa song ,” matud pa niya.

Ang “Ikaw Na”, gihatagan og kinabuhi sa miyembro sa House of Ella nga si Necie Diaz.

Matud pa ni Necie nga todo gyud ang preparasyon niya sa Cebu Pop ug wala gyud  siya modawat og mga gig sulod sa pipila ka adlaw aron lang gyud makondisyon ang iyang tingog.

Dakong garbo alang kaniya nga maka-interpret sa Cebu Pop ilabi na nga mao kini ang karaan na nga songwriting composition tibuok nasud.

Samtang ang makalingaw nga awit nga kabahin sa managtiayon nga mao ang “Gubot Pa Sa Lukot” mao usab ang midaog sa kategorya nga “Huni Sa Kasingkasing”.

Ang maong awit sinuwat ni Fr. Lyndon Ruiz nga mao usab ang nasuwat kaniadto sa Cebu pop winner nga  Nalumos sa Sabaw.

“Kining Gubot Pa Sa Lukot kay kinuha na nako sa isyu sa katilingban, dunay ubang magtiayon kung kumustahon, moingon nga gubot pa sa lukot ang ilang sitwasyon kay ang ilang partner nangaliwa  or dunay gibuhat dautan. Gipaagi kini nato sa kanta,  ug masuta nga dili gyud kana maayo ,”  suma pa ni Fr. Lyndon.

Ang  komedyanteng aktor sa CCTN-47 nga si Jun Villarta maoy nag-interpret sa “Gubot Pa Sa Lukot”  ug grabe ang kalipay niini gumikan kay  siya usab ang napili’ng Best Interpreter.

“Lipay kay ko, kay first time man gud nako nga naka-kanta ko og Cebu Pop, salamat kaayo sa Ginoo, ug salamat pud kang Fr. Lyndon sa iyang pagsalig kanako,” matud pa ni Jun.

Mapasalamaton siya kang Fr. Lyndon gumikan kay wala gyu’y bisag usa kaniadto ang niduol kaniya nga mao ang mokanta sa mga original nga binisaya nga komposisyon.

“Si Father Lyndon ra gyud ang miduol nako. Makaingon ko nga walay mohagad nako kay di man gud ko seryoso nga pagkatawo. Dako kaayo akong pasalamat ni Padre kay nakahunahuna gyud siya nako unya kay haum sab nako ang kanta”, gipadayag ni Villarta.

Ang mga mananaug sa matag kategorya nakadawat og P100,000. Ang mga wala makadaug nakadawat og  P20,000 matag usa. Samtang ang Best Interpreter nakadawat og P10, 000 cash. Ang Best Music Video ug People’s Choice nakadawat sab og tag- P10,000 nga cash.

Ang pagpahigayon sa tinuig nga Cebu Pop Music Festival nagsilbi kini nga halad sa Mayor sa Dakbayan sa Talisay nga si Atty. Eduardo Gullas. Ang maong kalihukan mao ang nagsilbi nga taytayan aron sa pagpadayag sa dakong gugma niya  ngadto sa Balaang Bata nga si Señor Santo Niño ug ingon man sa pagpadayag sa pagmahal sa Sugbo pinaagi sa pagpalambo Sugbuanong musika.

Gawas sa gipahigayong kompetisyon, mipasundayag ang mga gipasigarbo nato nga mga Sugbuanon nga nakaangkon og pasidungog og pag-ila dinhi sa nasud.

Nipasundayag ang nagpasikat nga “Pero Atik Ra” nga si Jacky Chang. Anaa usab ang Pilipinas Got Talent audition passers nga sila si Genevieve Flores, Raechelle Mae Faelnar ug Kristina Cassandra Dilao nga mao karon ang naglangkob sa “Maka Girls”.

Wala usab magpaulahi sa paghatag og kalingawan ang sikat nga amahan ug anak tandem nila ni Diego ug Gedent nga mao ang naglangkob sa Crazy Duo kinsa misikat human sa ilang pagsalmot sa The Funny One sa It’s Showtime.

Niadtong gabhiona gihatagan usab og  espesyal nga pasidungog  sila si Teban ug Goliat gumikan sa ilang dakong natampo sa entertainment industry sa Sugbo.

Nasayran nga nisikat ang duha gumikan sa ilang mga pasiaw sa kahanginan ug mapasalamaton sila kang Gullas sa wala damha nga pasidungog nga ilang nadawat.

Wala una gipahibalo ang mga kategorya sa sunod tuig. Matud pa sa project director nga si Gloria Villarojo nga iapas lang unya og pagpahibawo pinaagi sa mga sinaligan nga mga tigpakatap sa mga balita ug sa ilang Facebook page.