Juarez siblings, shining bright

CEBU, Philippines — Alegre gyud ang mahitabong Facebook Live Session sa Banat News matag Martes pinaagi sa mga nagkadaiyang episode sa #MARKado Live sanglit gawas sa lapad nga impormasyon, manggawas usab ang kataw-anan nga habig sa matag personalidad nga giimbitar niini.

Sa miaging semana, nibisita sa Banat News ang Juarez siblings nga gilangkoban nila ni Aiana Juarez, Anton Juarez ug Miko Juarez .

Nahinabi ni Banat News Hugyaw editor Ryan Mark ang tulo dul-an sa usa ka oras mahitungod sa ilang mga kaagi sa kinabuhi, ingon man usab ang sugilanon sa likod sa ilang mga kanta ug giunsa nila pagmugna ang ilang grupo.

Una nga misalang sa hot seat ang Pinoy Boyband Superstar finalist nga si Miko. Pulong pa ni Miko nga ang iyang pag-apil sa maong kompetisyon wala gyud niya damha nga moabot sa iyang kinabuhi.

Unom ka tuig nga nagpuyo ang pamilya nila ni Miko sa Canada. Matud pa ni Miko nga ang iyang amahan nga si Eugene Juarez ang una nga nanimpad didto ug human sa duha ka tuig, nag-uban na silang upat ka managsuon ug ang inahan nila nga si Azenith.

Si Miko ang ikatulo sa upat ka managsuon. Gisundan niya ang maguwang nga kaluha nga si Anton ug Guill nga puros adunay katakus sa arts. Aduna sab siya’y manghud nga si Aiana nga maayo usab mokanta.

Gipasigarbo ni Miko nga silang upat ka managsuon, aduna gyuy dakong pagmahal sa musika.

Matud pa niya bata pa lang sila, gikahiligan na nila ang music channel nga MTV (Music Television) ug dili expose sa kingkoy nga mga salida.

“Mga 4 or 5 years old mi kay na-engganyo name motan-aw og MTV kanang mga music videos sab. Una namo na-idolize nga grupo kay ang Backstreet Boys”, suma pa ni Miko.

Mao nga paglabay sa panahon, nakahimo na sila og banda ug gitawag kini nila og Game 4. Gilangkuban ang maong banda nilang upat ka managsuon. Si Miko ang nagsilbing drummer. Si Anton ang lead guitarist ug guitarist sab si Aiana. Aron mokompleto ang banda, nahimong bassist ang kaluha ni Anton nga si Guill.

Sa ilang pagpanimpad didto sa Canada, wala sila makasagang sa pagbag-o sa dagan sa ilang kinabuhi.

“Una kay lingaw kaayo mi kay syempre excited kaayo mi sa snow. So kami, naghuwat sab tawn mi sa snow pero the next day na ato kay di nami ganahan kay di mi kalaag gud. Mas worst pa siya kaysa sa uwan. Tugnaw kaayo didto oy bisag mag-heater didto sa balay gud kay di mada, bugnaw gihapon. Mag-jacket gihapon mi bisag naa sud sa balay”, suma pa ni Miko.

Nabaghuan sab si Miko sa ilang pagpuyo didto sa Canada gumikan kay naandan na nila kasaba ug ang mga kasikas nga ilang madungog sa palibot apan dakong kakugang nila nga halos mabungol na sila sa kahilom didtong dapita.

Gani, lakip sab si Miko sa nanginabuhi didto sa Canada gawas sa iyang mga igsuon ug iyang ginikanan.

“Trabaho nako una kay sa restaurant (assistant sa Cook), then tiglimpyo og sakyanan”, suma pa ni Miko.

Gipaambit sab ni Miko nga bisan og matag adlaw sila nga nanikaysikay sa ilang pagpanarbaho ug pagtungha, gipaninguha gihapon nila nga makagahin og oras alang sa ilang panagtapok.

Sa matag higayon nga magkapundok silang upat, mag-bonding gyud sila pinaagi sa pagkanta o ang pagpalanog sa ilang musika. Kon aduna sila’y free time, magbuhat sila og song covers.

Sa ilang pag-upload og cover videos sa YouTube, wala nila damha nga matagad kini sa kadaghanan. Pipila sa  cover songs nga ilang nagama mao ang mga awit sa ABS-CBN teleserye  Dolce Amore nga ‘Muling Magkalayo’ ug ‘Your Love’.

Mao kadto ang hugna sa ilang kinabuhi nga giimbitar sila sa ASAP aron mopasundayag sa mga awit nga ilang gihimoan og cover.

Sa ilang pag-uli dinhi sa nasud, wala na sab gyud damha ni Miko nga adunay dakong kahigayunan nga moabot sa iyang kinabuhi isip usa ka artist.

“Niingon man akong Lola (Dulcita Siroy) nga naay audition daw. Dili pa man to Pinoy Boyband ang tawag ato. Naa may kaila si Lola nako nga ipasuway ko niya og audition mao to ni-audition ko. Pero di man gyud kaayo to nako maingon nga seryoso gyud. Wa lang, ni-audition lang ko since naa na man mi didto sa Manila. Ni-audition gyud ko unya mao to, na-call back ko  ikatulo gyud to. Human sa pila ka call back kay audition na gyud (kun diin anaa na gyud sa atubangan nila ni Vice Ganda, Sandara Park ug Aga Muhlach)”, nagkanayon si Miko.

Didto na nagsugod nga mas na-pressure na ang pamati ni Miko gumikan kay nagduha-duha siya og matagad ba siya sa mga hurado tungod kay nagbaha na ang mga gwapo nga angayan usab gyud nga makasulod sa kompetisyon.

Dakong kalipay ni Miko nga nakakuha siya og dakong porsiyento gikan sa audience. Apan wala gihapon siya nagkompiyansa tungod kay lagi, daghan sila nga naghuwat sa makalahutay ngadto sa katapusan sa show.

Gitug-an sab ni Miko nga  nabaghuan siya sukad siya mitapos sa maong kompetisyon gumikan kay niadtong tungura, samtang nagdagan pa ang kompetisyon, kanunay siya nga fully- booked ug na-stress usab siya tungod kay kanunay siya makulbaan. Apan giangkon sab niya nga na-enjoy gyud niya ang mga kahigayunan nga iyang nasinati ,

Pipila ka buwan human sa kompetisyon, padayon ang pagbubo sa mga gasa ngadto kaniya ug sa iyang mga igsuon. Matud pa ni Miko nga nagbukas og bag-ong talent agency si Boy Abunda ug gitawag kini karon og Asian Artist Agency ug nangita kini og bag-ong artist.

Gipasalamatan ni Miko si Tito Boy gumikan kay misalig gyud kini sa iyang katakus ug lakip na usab ang iyang mga igsuon nga ubos na usab sa pagdumala sa “king of talk.”

Karon nga ubos na sila sa maong ahensya sulod sa duha ka tuig, padayon sila sa pag-atiman sa ikaduhang album ni Miko diin ang mga awit niini ginama ni Anton.

Si Anton mao ang nahimong kompositor ug tigama sa areglo sa mga kanta sa iyang mga igsuon nga si Aiana ug Miko.

Karon nga nagsugod na og lawig ang ilang karera, nanghinaut si Miko nga suportahan sila hangtud nga makaangkon sila sa ilang gitinguha sa ilang kinabuhi.

Kasamtangan niya nga gipromote ang awit nga “Hugot” nga gi-release sa Star Music. Ka-duet ni Miko sa maong kanta ang laing singer nga si Gab Umali.