Unsaon pagkontrol sa appetite?

CEBU, Philippines — Kay panahon na sab sa kasadya ug hudyaka, mas magsadya sab gyud ang atong tiyan gumikan kay pirmi kini puno tungod sa sagunson nga imbitasyon gikan sa atong mga kauban sa buhat, kabanay,kaigsuonan ug mga kahigalaan kinsa mopahigayon gyud og selebrasyon aron magkahiusa kita alang sa panahon sa pagkatawo sa anak sa Ginoo nga si Hesukristo.

Tungod sa kadaghanang tambungan nga party, dili gyud malikayan nga sa wala pa’y bag-ong tuig, monambok na gyud kita gumikan kay wala na kaayo nato mabantayi ang atong mga kinaon.

Gani, usa sa dakong tinubdan mao ang kalit nga pagpanambok mao ang pagkakugang sa atong appetite.

Ang imong normal nga pamaagi sa pagkaon, dili maayo nga pakalitan ilabi na bultuhon og pangumbira gumikan kay dili sab gyud kini makaayo sa atong lawas. Nabusog man kita apan makaguba kini sa galingan sa tiyan gumikan kay nakuratan sab kini sa iyang pagmaneho sa pag-galing sa atong kinaon.

Mao nga aron makalikay sa pagkaguba sa atong appetite, adunay unom ka mga pamaagi ang gidalit sa www.shape.com aron makamao kita sa pag-kontrol niini.

1. Inum og tubig. Mas labing maayo nga moinum gyud kita og tubig una mokaon ilabi na og nagutman kita. Ang pag-inum og tubig, usa sa pamaagi aron makalikay sa pasmo.

2. Mas labing maayo nga molihok kita og ginagmay, (mobarog o maglakaw-lakaw ginagmay) aron dili makabaton og bilbil ug dili sab gyud kanunay nga magpangita og pagkaon. Labing maayo sab nga mag-exercise matag buntag aron pabilin nga anaa sa saktong figure ang lawas.

3. Dili makalimot sa pagpamahaw. Ang pamahaw ang usa sa labing importante nga meal sa tibuok adlaw. Kon kita makapamahaw, ganado kita mobuhat sa atong mga gimbuhaton. Mao nga kon wala ka makapamahaw, mas dako ang imong makaon sa pagpaniudto nga usa sab kini sa rason sa dali nga pagpanambok.

4. Mokaon og mga pagkaon nga abunda sa prutina sama sa itlog, avocado, saging ug beans gumikan kay mao kini ang makatabang sa paghatag kanato og kusog matag adlaw. Kon adunay sakto nga prutina ang lawas, mao kini ang makakontrol sa imong pagpanginahanglan og kaon.

5. Mas labing maayo nga moinum gyud og tea aron malimpyo gyud ang sistema sa lawas ug alang sab kanunay ka nga bation og kabusog.

6. Kon adunay kumbira, iguon lang gyud ang kinaon ug dili magpalabi. Ang pagdisiplina sa kaugalingon ang mas labing epektibo nga makakontrol sa appetite.