Work for Art,Not Fame

CEBU, Philippines — Ang tanang designers mopalapad gyud sa tagsa tagsa nila ka mga forte.

Sama ni Manuel Tumaque nga lumad nga taga Tipolo, Mandaue City, ug 10 ka tuig na sa natad  sa fashion designing.

Bisan tuod og may dako siyang kaalam sa pagmugna og mga nagkadaiyang mga sanina, giangkon niya nga mas molutaw ang kaanindot sa iyang mga obra kun wedding gowns na ang hisgutan.

Iyang giangkon nga sa maong natad siya mas nailhan sa kadaghanan niyang mga kliyente.

Pangangkon niya, aesthetically classicist ug romanticist siya pag-abot sa pagmugna niining maong klase sa sanina.

Buot pasabot, mas palugwaun niya ang mga desinyo sa classical period.

Sa matag wedding gowns nga iyang pagabuhatun, iyang paningkamutan nga makab-ot niya ang gipangita nga timpla sa sanina sa iyang mga bride-to-be nga costumers.

Sila ang giisip ni Manuel nga backbones sa pagpadayun niya sa pagpanimpad niining kalibutan nga iyang gisudlan.

Ang iyang mga kliyente matud pa niya maoy rason kon nganung hinay hinay niyang nakab-ot ang iyang mga damgo hinungdan nga dako gyud ang iyang pasalamat niini.

Usa sa mga common nga senaryo nga iyang gisagubang mao ang walay tulganay arun lang maabot niya ang deadline sa sapot nga iyang gimugna.

Importante sab matud pa nga mahatagan og good quality nga output ang customers ug makab-ot ang target nga desinyo nga “walang labis, walang kulang.”

Pahimangno sab niya sa mga bag-ong usbong karon nga designers mao ang pagpadayun sa pag -explore sa kalibutan sa fashion industry sanglit mas dali na lamang ang panahon sa pag-kat-on karon tungod sa advancement sa teknolohiya ikumpara niadtong mga panahon nga nagsugod pa lamang siya.

“Be on time gyud if ever mag-start na mo og dealing sa client. Kay based on experience, ma-feel sa client nga you are giving them importance and you’re not treating them as your second choice and above all, you should work for art and not for fame,” dugang pa ni Manuel.

Pagbalik lantaw niya sa iyang pagsugod sa maong industriya, lab-as pa sa iyang panumduman sa dihang 16 anyos pa lamang siya human siya mi-graduate sa high school, gipail-ila siya sa higala niyang si Allain Fonte ngadto kang Ray Kuan, usa ka senior designer nga nangita og assistant niadtong higayona.

Tuod man, nakatrabaho siya sa maong shop ug didto na nabaid ang iyang abilidad ug didto sab siya nakat-on sa mga nagkadaiyang stratehiya sa fashion designing.

Karon, aduna na siyay kaugalingon niyang shop nga maoy nagsustener sa pang- adlaw adlaw niyang galastohanan.

Ubay-ubay na sab nga mga pasidungog ang iyang nadawat nga miila sa linahi niyang talento sa fashion designing.

Usa niini mao ang pagka-finalist niya sa 3rd Cebu Young Designers Competition niadtong tuig 2007 , usa kini ka kompetisyon diin ang senior designers maoy nagsilbing hurado alang sa mga bag-ong nabantug nga designers sa Sugbo nga musunod sa ilang henerasyon.

Dili pa lang dugay ,nalakip ang iyang mga obra maestra nga wedding gowns nga girampa sa usa ka most anticipated annual wedding fair nga nahitabo sa usa sa mga dakong hotel dinhi sa Sugbo diin nakauban niya sa pagpasundayag sa maong event ang mga masterpiece sab sa giidolo niyang si Carry Santiago.

Giangkon ni Manuel nga sa panahong padung na siya matulog ug panahon sa kamingaw manggawas sa iyang hunahuna ang mga maanindot nga desinyo hinungdan nga mapugos siya usahay sa pag-sketch niini.

Luyo sa mga nakab ot niyang kalampusan sa kalibutan sa designing, giangkon niya nga adunay higayun kaniadto nga gusto na siyang moundang sa pagdesinyo tungod sa dili niya masabtang kinaiya sa uban niyang mga kliyente.

 “I feel like exhausted. But in the long run, I have learned that taste is just personal and I am born partly to justify their taste,” matud pa niya.

Dugang pa niya, usa sa labing dakong hagit nga iyang nasugatan isip usa ka designer mao ang pagbuhat og bisti nga kuwang sa oras, resources ug materyales , apan sa maong sitwasyon mugawas usahay ang iyahang creativity.

Pipila lamang kini sa mga senaryo nga iyang nakat-onan.

Sa pag- aginod sa unahan, mao sab ang way puas niyang pagpasalamat sa mga tawong nakahatag og kontribusyon sa iyang kalampusan.

“Salamat kaayo sa pag-refer ninyu nako pirme. Thank you sa pag- patronize ninyu pirme sa akong mga work of arts. Salamat kaayo sa dako ninyung pagsalig. Akong paninguhaun nga consistent ko sa akong mga trabaho. I will try my very best for all of you,” suma pa niya. (BANAT NEWS)