“Oportunity knocks but once”

Fast Facts

Name: Aldwin Ornopia Guardiana

Nickname : JLO

Name of Boutique:Art Fashion Tailoring Co. Llc

Address:Dairatulmiya Khalidiya St, Abu Dhabi UAE

Birthdate: April 4. 1982

Place of Birth:Sabang Danao City

Age:35

Facebook Page/Facebook Account: https://www.facebook.com/jloaldwin

Motto: Opportunity knocks but once.

Di ikalimod nga kung fashion designing na ang hisgutan, mopatigbabaw gyud ang pangalan sa Pinoy dili  lang dinhi sa Pilipinas kun di lakip na usab sa nagkadaiyang dapit sa kalibutan.

Gani pipila sa mga nabantug nga designers mas gipili nga didto na lamang manimpad sa laing lugar kay didto nila nakita ang mas taas nga demand sa mga kliyente nga nanginahanglan kanila.

Ubay-ubay sab kanila ang naila sa international scene tungod sa linahi nilang “touch” sa matag desinyo nga ilang pagahimuon.

Usa na niini si Aldwin Ornopia Guardiana, lumad nga taga Sabang, Danao City.

Mapasigarbuhon niyang gipaambit ang labing dakong pasidungog nga iyang naangkon dili pa lang dugay.

Siya ang nigawas nga mananaug sa The Filipino Times, usa ka leading newspaper sa Gulf isip Best Fashion Designer of the Year. Dako ang iyang kalipay sanglit ang maong klase nga award mao usab ang nadawat kaniadto sa sikat nga designer nga si Michael Cinco.

Gani hangtud karon, daw gibayaw gihapon siya sa himaya tungod kay kuti ang proseso sa pagpili sa mga tawo nga maoy mahimong recipient sa maong pasidungog. Gipaambit sab ni Aldwin nga ubay-ubay na ka mga personalidad nga iyang nabistihan.  Kini sama nila ni Miss World Megan Young, Miss Universe Pia Wurtzbach, Venus Raj, Lanie Misalucha ug daghan pa. Saysay pa ni Aldwin, nagsugod ang tanan sa tuig 2002 diin freelance fashion designer siya.

Giangkon niya nga sa maong panahon wa gayud siya’y formal education ug wa sab siya’y certificate  nga ikapanghambug sa kadaghanan nga siya nakatungha sa usa ka fashion school.

Bugtong ang damgo lamang niya nga mamahimong designer ang naghigot kaniya sa pagpadayun sa iyang pangandoy nga mamahimong usa ka inilang designer.

Hangtud nga gidala siya sa iyang amahan sa Abu Dhabi ug didto siya nanarbaho isip assistant fashion designer.

Dako ang iyang kalipay sa maong kasinatian sanglit nakat-on siya sa middle eastern touch nga mao gyuy nakapaila kaniya sa mga Arabo niyang kliyente.

Suma total, 16 ka tuig na siya sa maong industriya.

Tungod sa mga pagsulay nga kasagarang masugatan sa designers, wala  gilimod ni Aldwin nga duna’y mga higayon nga nagplano siya nga moundang sa maong industriya.

Apan sa matag panahon nga  makahuna -huna siya niini, adunay tingug nga muhunghong luyo sa iyang hunahuna sa pagpadayun  sa iyang pagpanimpad sa butang nga iyang giganahan, ug dili niya undangon ang pagdesinyo.

Gipabuhagay usab ni Aldwin ang iyang dakong pag- idolo kang Alexander Mc Queen sa kalibutan sa fashion designing tungod kay alang kaniya gihigugma niya ang mga kasinatian niini.

Pangandoy karon sa Sugbuanong designer mao ang makahimog bisti nilang Kris Aquino ug Jessica Parker.

Usa lamang ang tumong ni Aldwin sa pagmugna og mga sanina sa iyang mga customers, ug kini mao ang  pagdiskubre  sa hugyaw nilang awra  sa higayon nga mosul-ob kini sa iyang mga mugna.

Sa iyang kasinatian sa laing nasud, iyahang nabatyagan nga mogasto gyud og maayo ang mga Arabo sa pagpahimo og mga wedding gown.

Dako ang pasalamat ni Aldwin sa iyang mga nahimong customers sa gawas sa nasud ug maingon man dinhi sa Pilipinas.

Panaad niya nga magpadayun siya sa pagmugna og dekalidad nga mga desinyo ug mga naandang bisti nga may dakong tatak sa iyahang hiniusang mugna nga maoy kasagarang pinangita sa mga nagbalik -balik niyang mga kliyente. Kon unsa ka dako ang iyang pasalamat sa iyang mga kliyente mao usab ang pag-tan aw niya og dakong utang kabubut-on sa iyang mga sakop. “Love your workers and they will respect and love you back. Success of one is success of all. I let them feel that they too are designers. I always believe that a person who does decorations, pattern making, cut and sew is a designer as well. I see to it that I always give them recognition,” matud pa ni niya. (BANAT NEWS)