Banat ( Leaderboard Top ), pagematch: 1, sectionmatch: 1

Fashionable Friday Nasunod nga abilidad

Fastfacts

Pinky Magalona

Nickname              Pinky

Name of Boutique               Pinky Magalona

Address  A.S. Fortuna St. Mandaue City

Birthdate                Aug. 19, 1986

Place of Birth        Cebu City

Age         31

Facebook Page/Facebook Account  Pinky Magalona

Usa sa mga dakong rason nga makaimpluwensya sa usa ka tawo mao ang mga nadak-an ug naandan niining gimbuhaton sa panimalay. Mga trabahuon nga mao nay imong mamatikdang buhatun sa imong mga ginikanan matag buntag sa imong pagmata.

Usahay tungod kay naandan na, mabaliwala na kini ,apan wala damha, ikaw diay ang musunod sa pagdumala niini nga mao na’y nagsilbing panginabuhian sa imong pamilya.

Mao kini ang storya sa kinabuhi ni Pinky Magalona sa kalibutan sa fashion designing.

   Matag adlaw sa iyang pagmata, naandan na niyang makita ang iyang mama ug papa nga modiretso sa makina sa tahianan arun manahi og mga sanina sa ilang mga suki.

Niadtong bata pa lang siya, samtang nagduwa sila sa iyang mga silingang bata, tawagon gyud siya sa iyang ginikanan ug patabangon og pataod og butones sa ilang gipangtahi.

Mohilak siya kay wa pa siyay gusto sa maong trabaho ug ang naghari sa iyang hunahuna mao ang pagduwa.

Syete anyos si Pinky sa dihang nakat-on na siya’g panahi gamit ang de padyak nga makina.

Dili  gyud niya malimtan ang higayun nga natusok ang iyang middle finger sa dagum sa makina apan wa kini makapahunong kaniya sa pagpanahi.

Apan wa magtuo si Pinky nga mahimo siyang fashion designer sanglit alang kaniya dili lalim ang maagian sa designers, gawas nga nagkinahanglan kini og mga koneksyon ,kinahanglan usab nga may dako- dako nga  kwarta arun makasustener sa  maong industriya.

Tuig 2011 sa dihang nabatyagan ni Edwin Ao ang linahi niya  nga talento sa pag mugna og mga sanina.  Busa naningkamot si Ao nga  makasalmot si Pia sa Cebu Young Designers Competition.

Bisag nagduha -duha siya sa iyang kaugalingon, gibitbit niya sa maong kompetisyon ang dakong salig ni Ao kaniya ug ang mga kasinatian niya sa pagama og mga bisti sa dihang bata pa siya.

Tuod man, siya ang labing unang babaye nga migawas nga mananaog sa maong kompetisyon.

Usa sa mga pasidungog nga nadawat niya sa maong kompetisyon mao ang libre niyang pagtungha sa School of Fashion and the Arts sa Manila.

Ug dinhi na nagsugod ang pagkisaw og maayo sa pangalang Pinky Magalona sa kalibutan sa fashion designing.

Nakahinumdum pa siya niadtong tuig 2011 hangtud 2012  nga sa paghuman niya’g daog sa maong kompetisyon, naghinay-hinay na siya’g panawat og mga kliyente diin ang kita niya niini mao ang iyang giplete sa Manila ug gisustener sa mga galastuhunon sa pagtungha niya sa scholarship nga iyang nadag-an.

“Makahinumdom ko kanang magsakay kog jeep ug FX  sa Manila, daghan kaayo kog bitbit nga mga panapton, mga rulers ug mga libro pa nako. Hastang bug-ata gyud. Makahilak lang ko’g kalit tungod sa kalisud. Pero wala gyud nisulod sa akong hunahuna nga moundang ko kay grabe ka supportive ang mga tawo nga nagpalibot nako,” saysay pa ni Pinky.

Sa padayun niyang pagpanimpad sa fashion designing, ubay ubay na sab nga mga personalidad ang iyang nabistihan.

Dako niyang kalipay nga nahatagan siya og kahiyagunan nga makapasapot sa pipila ka celebrities nga iyang giidolo sama nilang Kim Chiu, Yeng Constantino ug ingon man si Miss Universe 2015 Pia Wurtzbach.

Karong bag-o lang, nahatagan siya og kahigayunan nga malakip didto sa kauluhan sa mga pinasidunggang dinapit sa Preview Emerging Fashion Talent 2017 diin usa siya sa giila nga padayung misulbong sa fashion designing sa tibuok nasud karong panahona.

Sa tanan niyang giagian isip designer, nakat -on siya sa paghatag sa tanan niya nga best sa iyang tinagoang talento.

Gisaad gyud niya kanunay sa iyang mga kliyente nga hatagan gyud niya kini og katagbawan sa mga produkto nga iyang mugnaon.

Q and A

BNH: Unsay dili nimo malimtan nga imong kasinatian isip usa ka designer?

PINKY: Ang time nga naa ko sa Kuwait. As in daghan kaayo ko’g na learn didto. Like beadwork, embroidery, lain-laing klase nga fabric ug arabic names sa materials, different techniques nila. Daghan gyud ko’g na learn didto nga nakapa -grow nako isip designer.

BNH: Unsay imong mensahe sa mga young aspiring designer karon?

PINKY: Never give up, buhata tanan para makab-ot nimo ang imong mga pangandoy. Stay focused sa imong dream and pray. Dili gyud malikayan nga naa gyuy times sa atong kinabuhi nga madagma ta, makabuhat ta og sayop pero ayaw ni himua nga rason para moundang na ka, instead gamita ni para makabangon ka ug molambo pa ka.

BNH: Gawas sa imong pagka -designer, unsa pay gusto nimong makab-ot o mabuhat sa imong kinabuhi?

PINKY: Happy and contented nako.Hopefully mas mo-boom pa ug mas modaghan pa ang clients. Ug siguro magka -family na unta ko kay 31 naman ko. (BANAT NEWS)

  • Follow Us: