Bee Inspired by the Queen

CEBU, Philippines — “There’s hope in getting acceptance to your family”, mao kini ang usa ka pagtulun-an nga gipaambit ni 2011 Queen Universe Bee Urgello, atol sa iyang interview sa FB Live session sa Banat News facebook page, niining bag-o lang.

Si Bee Urgello maoy nahimong ikatulong Queen Universe sa dihang gipahigayon ang labing hugyaw nga beauty pageant sa mga transgender nga mao ang Queen of Cebu niadtong 2011. Nagsugod ang Queen of Cebu niadtong 2009 nga gipasiugdahan ni Cary Santiago.

Sa pagpakighinabi niya sa  #MARKado Live nga gidumala ni Hugyaw editor Ryan Mark, gipaambit sab niya nga special gyud siya niadtong bata pa lang siya tungod kay namat-an niya nga sa dihang nagskwela pa lang siya og nursery, magkinto siya nga maglakaw. Dugang pa niya nga himuon niya’ng off shoulder ang iyang sando dayun sekreto niya nga gamiton ang heels sa iyang inahan ug igsuon nga babaye aron magpaso-paso.

Bisan napakita na niya ang iyang tinuod nga siya, kasab-an gyud siya sa iyang ginikanan tungod kay lalaki siya sa dihang gihimugso siya. Pagtungtong niya og high school, didto na siya direktang giingnan sa iyang amahan nga abnormal siya nga pagkatawo tungod sa iyang sekswalidad.

Giangkon niya nga bungulon gyud siya tungod kay kanunay gyud nakapasok sa iyang mga dunggan ang earphones sa iyang walkman aron makalingkawas sa kaguol nga iyang gibati ug sa mga pagtamay-tamay nga iyang nasinati sa dihang bata pa lang siya.

Nakasuway siya nga ma-bully niadtong nagtungha pa siya sa high school. Tungod kay lagi lahi gyud siya sa iyang mga kauban sa classroom nga puno sa lalaki, dapatan gyud siya ug bugalbugalan.

Gawas sa mga bully niya nga classmates, aduna usab siya’y matawag nga mga higala tungod kay aduna siya’y nahimong tulo ka suod nga higala nga sama og kasingkasing kaniya. Matud pa niya nga kanunay sila nga mag-bonding matag break-time mao nga dill gyud tanto nga miserable ang iyang pag-eskwela.

“I think dili mi maka-survive pag- high school if we never had each other”, suma pa ni Bee.

Nahimong usa ka registered nurse si Bee apan wala niya magamit ang iyang propesyon gumikan kay strikto nga gipatuman sa mga hospital ang tukma gyud nga uniporme.

Gitug-an ni Bee nga Fine Arts gyud unta ang iyang gusto nga kuhaon nga kurso apan wala siya sugti sa iyang mga ginikanan kay aron dili musamot nga magbinabay siya.

Human siya migradwar sa kolehiyo ug human sa pag-take sa licensure exam sa nursing, didto na nagkaguliyang og samot ang iyang kinabuhi.

 “Okay ra sila na I’m gay, but they weren’t okay about me looking like a woman. Being a gay is different from a transgender or a transwoman. They didn’t get that and I wasn’t happy. Every day was a struggle. Everyday pirmi ko makasab-an”, butyag ni Bee.

Busa, nibiya siya sa ilang balay ug nagkinaugalingon, pinaagi usab sa iyang pagtrabaho sa usa ka call center.

 “Ang akong paglayas kay nagtuo gyud ko na dili nako kauli. Lisod oy kay wala ko maanad sa mga household chores. Dili  ko kahibalo manilhig, mohugas, manglaba ug dili ko kahibaw mosakay og jeep”, pagtug-an ni Bee, kinsa naggikan sa usa ka adunahan nga pamilya.

Gani, gibutyag sab niya nga sa dihang mitungtong na siya og kolehiyo, dili gihapon siya kamao mosakay og jeep.

“Mosakay ko pero dili ko kamao na ako lang usa. Magkuyog-kuyog ko sa akong classmates before. It was an adventure being with them because I never got the chance to experience that growing up but it changed when I ran away from home”, hinumdom pa niya.

Matud pa ni Bee nga daghan siya og nakat-unan nga mga pagtulun-an sa iyang inusarang pagpuyo sama sa pagdaginot sa iyang kwarta, pagpanikaysikay-sikay aron siya mabuhi ug didto na siya nahigmata sa kamatuoran nga dili sa tanang panahon haruhay ang kinabuhi.

Hinay-hinay nga mibarog si Bee sa iyang kaugalingong tiil ug wala gyud magsalig sa iyang mga ginikanan.

Paglabay sa  duha ka tuig, wala niya damha nga manawag ang iyang inahan ngadto kaniya. Nangumusta ug gipahibawo siya nga andam na mosabot ang iyang amahan sa iyang pagkasiya mao nga nakadesisyon siya nga mopauli sa ilaha.

“I went home last Christmas  2012. It was awkward. Akong daddy kay wa siya kahibaw sa iyang reaction. Yes, awkward siya pero comforting siya ba”, saysay ni Bee.

Inanay siya nga gidawat sa iyang amahan ug mga iyaan human sa iyang pagpa-uli. Mao nga misuporta gyud kini kaniya aron dili na siya molayo niini.

Gibutyag ni Bee nga sa wala  pa siya niapil sa Queen of Cebu, nangayo una siya og pagtugot gikan sa iyang pamilya. Malipayon siya nga wala kini duha-duha ug misugot kini.

“Queen (of Cebu) 2010, I was one of the audience, then na-awardan man ko og ‘Best Dress of the Night’ so when my parents found out about it, I was expecting of a negative nga reaction, but they were okay man diay. My mom said, ‘Nganong wa na man lang miapil?,” asoy pa ni Bee.

Gumikan niini naikag ug nadasig siya aron hingpit na gayud nga musalmot og pageant, nga dugay na niyang gipangandoy.

“Queen of Cebu was the only pageant that I want to join. It was a pageant that was accepted by all society from all walks of life. Taas kaayo sila og pagtan-aw ana nga pageant. And also the title itself”, padayag ni Bee.

Human sa iyang kalampusan, nabatyagan niya nga 100% na gyud siya nga gidawat sa iyang pamilya ilabi na sa iyang mga ginikanan tungod kay nagpahigayon gyud og selebrasyon ang iyang inahan sa ilang balay.

Maingon usab ni Bee nga daghan ang nahimong kaayuhan ang iyang pagkarayna sa QoC tungod kay nausab gyud ang dagan sa iyang kinabuhi.

“The love of a family is so powerful. It can overcome anything”, makahuluganon niyang pamahayag.

Dugang pa ni Bee nga human usab sa maong kompetisyon, nihumot gyud ang iyang pangan ug daghan na usab ang mikuha niya isip usa ka model ug commercial model.

“It was also my dreams being achieved. Dreams I never thought would come true kay before ganahan ko ma-beauty queen and at the same time kay makarampa sa usa ka fashion show ug masininaan gikan sa nagkalain-laing designer. Mao nga what I am today and the acceptance I earned was all because of Queen of Cebu”, panapos pa ni Bee.

I-like ang atong fb page alang sa mga balita ug live interviews.

Pangitaa sa facebook: Banat News