Dili pilian

CEBU, Philippines — Gibutyag  ni Sandara Park nga dili kaayo siya partikular  sa brand sa iyang mga sapot .  Ang labing importante kaniya  nga ganahan siya sa desinyo niini .   Usa sa labing barato nga iyang napalit mao ang T-Shirt sa Boracay nga nagkantidad og P199.

Pauleen gipahilak ni Danica

Nakahilak  si Pauleen Luna  atol sa iyang baby shower gumikan sa  mensahe  ni  Danica Sotto-Pingris.  Nasayran nga nisaad si Danica kang Pauleen nga magsilbi gyud siya nga buotan nga igsuon sa umaabot nga anak niini.

Trabaho ra diay

Mihatag og katin-awan  si Khalil  Ramos sa pagtikang nila ni  Gabbi Garcia didto sa Hongkong.  Gitataw ni Khalil nga siya ang direktor sa music video sa first single ni Gabbi nga "All I Need". Matud pa nga sa Hongkong gi-shoot ang maong music video.

Problema sa pinansyal

Giangkon ni Donita Rose nga nag-atubang gyud siya og financial problem.  Dako  matud pa og natabang ang pagkalakip niya sa  pelikulang Seven Sundays.  Matud pa niya nga nanambok siya busa nagduhaduha siya og dawat kaniadto sa maong proyekto apan nahuwasan siya sa dihang nasayran niya nga mabdos diay ang iyang role.

Wala madayon

Gibutyag ni  Sue Ramirez  nga wala na lang siya mopahigayon og debut party gumikan kay gusto lang niya nga  simple lang ang selebrasyon sa iyang 18th birthday.  Usa sa nag-unang rason niini mao ang kamatayon sa iyang amahan sanglit pangandoy man niya kaniadto nga makauban  niya kini sa pagsayaw  sa iyang birthday.

Pinili sa direktor

Si Kim Chiu gyud ang personal choice ni Direk Chito S. Roño aron mahimong bida sa pelikulang The Ghost Bride. Sa dihang giplano ang maong proyekto, naa sa iyang hunahuna nga kinahanglang duna’y dugong Chinese ang mahimong bida niini busa nisantop dayon sa iyang hunahuna ang pangalan ni Kim.

Pasok sa Jambayan

Gikalipay og maayo ni Iñigo Pascual ang iyang pagkalaki sa bag-ong acoustic group sa "ASAP" nga Jambayan. Kauban niya sila si Moira dela Torre, Kaye Cal, Migz Haleco, Zia Quizon ug  "The Voice Kids" finalist Isabela Vinzon.  Gikanta nila niadtong Domingo ang  medley sa mga kanta sa  Moonstar88, Imago, Barbie's Cradle, Spongecola, ug  Orange and Lemons.

Gihatag ang sports car

Gihatag ni Jomari Ylana ang iyang mahalon nga vintage red Toyota sports car ngadto sa anak niya nga si Andre. Inatiman kaayo ni Jomari ang maong sakyanan sulod sa taas nga katuigan.  Matud pa nga nisulod na sa showbiz ang iyang anak busa gamit kaayo ang sakyanan.

Chinggoy mipanaw

Mipanaw na ang  beterananong aktor nga si Chinggoy Alonzo.

Pinaagi sa  Facebook, gibutyag  sa direktor nga si Mark Reyes ang pagpanaw sa aktor kagahapon.

 “Von Prin Devas to our original Evades of Encantadia 2006. Tito Chinggoy Alonso. He was one of my favorite actors to cast in my TV series and films. Rest well and take a bow,” suma pa ni Direk Mark.

Sa report sa pepph, giingong naghambin si Chinggoy og sakit nga colon cancer. Nagsugod si  Chinggoy sa teatro niadtong dekada ’60  ug politiko ang kasagaran niya nga karakter.

Ang labing una niya nga  pelikula mao ang  Buhay Artista Ngayon niadtong 1979.

Katapusan niya nga  pelikula mao ang  Etiquette for Mistresses niadtong 2015.

Samtang ang katapusan niya nga programa sa telebisyon  mao ang  Wildflower sa  ABS-CBN.

JM de Guzman nag-usab na!

Malipayong gipaambit ni JM de Guzman ang istado sa iyang  kinabuhi karon.  Human sa duha ka tuig nga nawala sa limelight, gibutyag  niya nga limpyo na siya ug hingpit na siya nga nag-usab.

Malipayon niya nga gi-share sa iyang Instagram account, nga nahuman gyud niya ang  iyang gisudlan nga Therapeutic Community program .

Wala na gidetalye ni JM ang rason sa pagsulod niya sa maong  programa.

Kahinumdoman nga nahilom og  kalit si JM sa showbiz ug gidungog kini nga nagpa-rehab human  matud pa nagbisyo nga niresulta sa panagbulag nila ni Jessy Mendiola.

Samtang ang kanhi niya kapares sa pelikulang That Thing Called Tadhana nga si Angelica Panganiban nipadayag nga gimingaw na siya sa aktor. 

Echo-Kristine series ipasalida sa Colombia

Sa labing unang higayon, duna’y Pinoy series ang ipasalida didto sa Colombia sugod ugma, October 18.

Ipasalida sa maong dapit ang serye nila ni Jericho Rosales ug Kristine Hermosa nga Dahil May Isang Ikaw .

Kahinumdoman nga sikat kaayo ang maong serye sa ABS-CBN niadtong 2009.

Sa  pagsikad niini sa Columbia,  magtangag kini sa titulo nga “Corazones Cruzados”.

Niadtong  2010,  ang   “Dahil May Isang Ikaw” nakaangkon og  International Emmy nomination sa  best telenovela category.  (BANAT NEWS)