Styrofoam

I do not know her story. Natandog lang ko nagtan-aw niya maong akong gikuhaan og hulagway. And as I took this picture, I was thinking, hayan og mamantala ni sa akong social media account ug mahisgutan dinhi sa okRYAN, makabig ang atensyon sa natungdan mga ahensya aron katabangan siya ug ang uban pang mga bata sama niya.

Tuod man, daghan ang natandog sab sama nako, human nako ni gi-upload sa akong facebook account. Kasagaran nila, sad face ang gipabuhagay nga reaksyon. Apan usbon ko, I do not know her story.  My act of publishing this is a call for action. Apan adunay pipila ka detalye nga mahimo nakong mapaambit.

Kining bataa, may mga kauban nga hingkod na nga babaye (iya tingaling mama), nga namaligya og kandila diha kilid sa basilica niadtong Biyernes sa gabii atol sa labing unang grand Marian procession. Aduna pa ni siyay kuyog nga mga bata nga bisan sa halawom na kaayo nga kagabhion (lapas na tungang gabii nahuman ang misa), busy pa kaayo og pamaligya’g kandila. Ang uban nila nagtunaw og mga ginamit na nga mga kandila nga ilang pinangayo sa mga deboto.

Diha ni sila ni pwesto atbang sa usa ka fastfood chain nga paborito sab sa mga bata. Gani, sa tupad ana niya may plastic nga may tatak sa fastfood, apan dili pagkaon ang sulod. Hayan gikapoy nana siya mao nang hinanok kaayo nga nakatulog. Gilabyan labyan ra na siya sa mga tawo. Nakakuha ko og hulagway kay diha mi tungod sa ilang gipwestohan nagtindog. Wala na lang sab ko nagdukiduki unsay ngalan ana niya pinaagi sa paghinabi sa iyang kauban sanglit nagpadayon man ang santos nga misa.

Unya pagdayon nang human, nitaligsik.  Gipukaw na siya atong babaye nga kauban nila. Gitapik siya og ka tulo, usa pa siya nakamata ug nitindog. Pagtindog niya, natugsaw iyang tiil diha sa tubig. Unya kay niundang man ang taligsik, nibalik ra sab na siya og higda. Apan pagkataod-taod, nikalit og uwan hinungdan nga nag-iyahay og dagan ang mga tawo aron mangita og kapasilungan. Paglingi nako, wala na siya diha sa iyang gihigdaan.

Karon samtang nagsuwat ko niining maong lindog, nakahunahuna ko: pagkataphaw sa kasagarang mga problema sa mga batan-on karon  nga akong mabasa sa facebook itandi sa sitwasyon niining bataa. Ang mga batan-on kusog kaayo mureklamo kay hinay ang signal sa internet, magmaoy kay wala tagda ni crush, nanluod kay walay bag-ong gadget, ug bisan unsa na lang nga binata ra kaayo. Kun dako na kaayo nang problema kanang inyong gimaoyan, asa na man lang puniton ang sitwasyon niining bataa nga wala ra gyuy reklamo ug hinanok kaayong natulog samtang naningkamot nga masulod ang iyang gamay’ng lawas nianang styrofoam?