Nagpa-relax sa Japan
CEBU, Philippines — Namakasyon og balik sa Japan sila si Jessy Mendiola ug Luis Manzano. Naandan na gyud sa duha nga manuroy kun bakante ang ilang mga oras. Todo post usab sa ilang Instagram sa mga hulagway sa lugar nga ilang gilaagan sa Japan.
Derrick mihimakak
Hugtanong gihimakak ni Derrick Monasterio ang tsika nga matud pa nagpataas na siya sa iyang talent fee. “Nagtataka nga po ako kung saan nanggagaling ang balitang iyon,” matud pa niya.
Dili makauban ang ginikanan
Gibutyag ni Winwyn Marquez nga dili makauban kaniya ang iyang ginikanan nga sila si Alma Moreno ug Joey Marquez sa pagrampa niya sa Reina Hispanoamericana sa Bolivia sunod buwan. Wala matud pa tugti si Alma sa iyang doktor nga mobiyahe ug layong dapit. Samtang si Joey adunay asthma busa dili kini makaagwanta og layo nga biyahe. Mouban kang Winwyn ang igsuon niya nga si Yeoj.
Mokanta sa theme song
Si Ken Chan ang mokanta mismo sa theme song sa movie nila ni Barbie Forteza sa Regal nga This Time I’ll Be Sweeter. Sa November 8 na ipasalida ang maong pelikula. Gi-release na usab ang official trailer niini.
Nagmalaumon gihapon
Nagmalaumon gihapon si Daniel Matsunaga nga magkatingog ra sila puhon sa iyang ex-girlfriend nga si Erich Gonzales. Nakasabot ra si Daniel kun nganong dili pa kini mahitabo karong panahona. Mag-agad ra siya sa dagan sa panahon.
Judy Ann’s Kitchen
Gisugdan na dili pa lang dugay ang online cooking show ni Judy Ann Santos nga nag-ulohan og Judy Ann’s Kitchen. Mahiligon gyud si Juday sa pagluto, gani nagmalampuson pud ang iyang cookbook nga gi-release niadtong 2015.
Charity work
Makahuluganon ang pagsaulog ni Maja Salvador sa iyang birthday sa miaging adlaw gumikan kay nakauban niya ang mga bata sa Bahay Kalinga sa Valenzuela City. Makalingaw nga party ang gidalit sa aktres ngadto sa mga bata nga inatiman sa Department of Social Welfare and Development (DSWD) .
Solusyon sa depresyon
Giangkon ni Nadine Lustre nga nagsagubang siya karon og depresyon ug iyaha gyud kini nga ipahungaw sa mga tawong duol sa iyang kasingkasing aron mahuwasan siya. Busa iyang gitambagan ang mga tawo nga duna’y depresyon nga modangop gyud sa mga tawo nga ilang maistoryahan. Nagbangotan karon ang aktres gumikan sa kamatayon sa iyang igsuon nga giingong naghikog.
Wala madayon
Gibutyag ni Ashley Ortega nga si Kris Aquino unta ang special guest sa Wowowin sa miaging adlaw apan wala siya masayod kung nganong wala kini madayon. Una na nga gibutyag sa host sa maong show nga si Willie Revillame nga tabangan niya si Kris nga makabalik sa telebisyon.
Jake sa Himig Handog
Puwerting lipaya ni Jake Zyrus gumikan kay nahatagan gyud siya og tsansa nga makasalmot sa Himig Handog 2017 isip usa sa mga interpreter. Si Jake maoy mohatag og kinabuhi sa awit nga “Bagyo” nga ginama ni Agatha Morallos."Siyempre po, ever since na nag-come out ako as Jake Zyrus, gusto ko po lahat ng experience ko ay fresh, maraming first time," matud pa niya.
Pasok sa AGT
Nakapasar sa audition ang 68 anyos nga Pinay rapper nga si Mercifuletes Viola sa "Asia's Got Talent". Gikanta niya ang Price Tag ni Jessie J ug puros mga pagdayeg ang nadawat niya gikan sa mga hurado.
Ellen mihimakak sa “buntis issue”
Hugtanong gihimakak sa Sugbuanon nga aktres nga si Ellen Adarna ang tsismis nga matud pa nagsabak siya.
Nagsugod ang maong taho sa dihang nikatap sa social media ang Facebook post sa veteran broadcaster nga si Jay Sonza kung diin nipaambit kini sa conversation sa iyang pag-umangkon nga ginganlan og "Elena."
Nilenggua ang iyang pag-umangkon nga nagsabak siya ug tua kini karon didto sa Morocco gumikan kay nagpa-relax. Naukay niini ang netizens ug nagduda nga si Ellen maoy gipasabot ni Jay nga iyang pag-umangkon.
Samtang sa habig ni Ellen, niklaro siya nga dili siya si Elena nga pag-umangkon ni Jay.
Gitataw usab niya nga dili sila kaliwat sa beteranong broadcaster . Kasamtangang nilaag si Ellen sa pipila ka dapit sa Europe uban sa gidungog niya nga boyfriend nga si John Lloyd Cruz.
Birdshot hukman sa Australia
Human nga napili nga official entry sa Pilipinas alang sa Best Foreign Language Film category sa 2018 Academy Awards.
Lain na pud nga maayong balita ang nadawat sa pelikulang "Birdshot" gumikan kay motigi usab kini alang sa Best Asian Film award sa Australian Academy of Cinema and Television Arts (AACTA).
Makatigi sa Birdshot ang "Dangal" "Pink," and "Kaasav: Turtle" (Inadia); "I Am Not Madame Bovary" "Our Time Will Come," ug "Wolf Warrior 2" (China) ; "Train to Busan" (South Korea) ug "Kimo no na wa” (Japan).
Mangulo sa mga hurado ang Hollywood star nga si Russell Crowe ug i-anunsyo ang mga mananaog sa AACTA ceremony sa Sydney karong December 6.
Ang Birdshot gibidahan nila ni Mary Joy Apostol , John Arcilla ug Arnold Reyes.
Unang adlaw Seven Sundays naka-P10M
Nagmaya ang Star Cinema gumikan kay gidumogan sa mga tawo ang unang adlaw sa pagpasalida sa family drama movie Seven Sundays niadtong October 11.
Sa unang adlaw, mikita na og P10 million ang maong pelikula nga gibidahan nila ni Dingdong Dantes, Enrique Gil, Cristine Reyes, Ronaldo Valdez, ug Aga Muhlach.
Si Cathy Garcia-Molina maoy direktor sa maong pelikula.
“Thank you so much, Kapamilya!,” suma pa sa Instagram post sa Star Cinema. (BANAT NEWS)
- Latest