Banat ( Leaderboard Top ), pagematch: 1, sectionmatch: 1

The Revelations of the Singing Priest

CEBU, Philippines — Naila si Father Jonas Mejares isip usa ka singing priest tungod sa iyang pagpakatap sa mga pulong sa Ginoo pinaagi sa musika atubangan sa kinabag-an sa mga manimbahay sa Basilica Minore Del Santo Niño sa dihang didto pa siya nadestino.

Matud pa niya nga nanglangkob sa tulo ka elemento ang musika sa paghatod sa mensahe sa ebanghelyo ngadto sa mga tawo.

“I want to preach through music. This is the most effective way para ma-spread nako ang word of God.Sa three elements, kun nay kanta kay maminaw sila, ma-delight sila ug mohagit pud kanila nga mao pud ang ilang himuon. I would see to it nga haum ang kanta sa ebanghelyo. Kay gihatag man ni sa akoa (talento), akong gamiton”, pulong pa ni Father Jonas.

Sa pagpakighinabi ni Father Jonas kang Banat News Hugyaw editor Ryan Mark sa usa ka edisyon sa #MARKado, gihugyaw niya ang mga Facebook viewers sa dihang mas gihisgutan pa ang kinsa ug unsa gyud ang tinuod nga Father Jonas luyo sa altar.

Ang usa ka oras nga panag-ambitay nagtuki sa mga rebelasyon sa iyang pagkatawo.

Nagtubo si Father Jonas didto sa Loon, Bohol. Anak siya og usa ka mangingisda. Siya ang ikaduha sa upat ka managsuon.

Sama sa uban nga mga bata, normal lang ang pagdako ni Father Jonas tungod kay nasuwayan niya ang mga duwa sa mga bata kaniadto. Matud pa niya nga malingaw siya sa mga tradisyonal nga mga duwa sama sa tagu-taguan, balay-balay, shatong, lamba-lamba.

“Kaming tanan, hilig mi og music. Aside sa among passion sa music, gawas ana, kaming tanan, hilig gyud mi og basketball and table tennis”, suma pa niya.

Maingon nga nagtubo siya sa typical nga pamilya nga relihiyoso gawas lang sa iyang amahan nga dili gyud mobisita og simbahan kaniadto.

“Sa bata pa ko, gikan gyud siya sa very religious nga family unya akong father is dili gyud tanto. Akong papa is dili gyud niya gusto nga magpari ko. Nakahinumdum ko nga nahimo gyud siya nga relihiyoso sa hapit nako mahimong pari. Nabag-o gyud siya”, asoy pa ni Father Jonas.

Gikumpirma ni Father Jonas nga ang unang rason kun ngano nakahukom siya nga magpari tungod kay nahatagan siya og inspirasyon sa iyang apuhan. Gawas sa maong inspirasyon, niadtong bata pa lang siya, nakita niya nga matag higayon nga adunay mobisita nga pari sa ilang panimalay, lami gyud ang mga iandam nga mga pagkaon.

“When I was in Grade 4 or Grade 5--didto nako sa akong lola, akong lola kay niadto og States. Uban sa iyang mga grandchildren namili siya kun kinsa iyang ganahan makauban. Not knowing, ako iyang gipili. Ako iyang gipili kay himuon ko niyang pari. I think didto na nagsugod kay naa man pud siya’y duha ka anak nga mga pari”, siya nagkanayun.

Niadtong mga panahuna, bisan og seminarista pa ang duha ka nahimo na nga pari karon, aduna gyu’y mobisita nga pari sa ilang panimalay ug halaran kini og mga lamian nga pagkaon. Dayon usab siya nga gi-ingganyo sa iyang apuhan nga bongga gyud ang kinabuhi sa mga pari tungod kay kanunay nga makakaon og mga lamian nga mga pagkaon.

Mao gyud kadto ang tinubdan ngano gibugtaw gyud niya ang pagkapari. Dugang pa nga mao nga gusto usab siya nga magpari kay gusto niya nga mapalambo ang iyang talento ug gusto usab niya masuta kun asa siya dapit nga mas labaw tali sa iyang kinamagwangan nga igsuon nga sama sab niya nga adunay talagsaon nga mga katakus.

Giangkon usab ni Father Jonas nga idolo niya ang iyang maguwang nga si Joel kun adunay kalambigitan sa musika ang hisgutan tungod kay aduna kini nahibal-an nga mga nagkadaiyang mga musical instruments nga wala niya mahibaw-i kun unsaon paggamit.

“Ang iyang musicality, mas maayo pa sa akoa kay innate gyud ang iyang talent”, suma pa niya.

Tungod sa iyang pagmahal sa musika, nakita niya nga adunay mga seminarista nga kusog usab nga manganta mao nga misulod gyud siya tungod sa maong duha ka tumong ug tungod sa inspirasyon nga gihatag sa iyang apuhan ngadto kaniya.

Sa pagsulod ni Fr. Jonas sa seminaryo, gihuna-huna gyud niya pag-ayo og angayan ba siya sa maong bokasyon.

“Naa ko sa seminaryo for a year, nag-reflect ko og ‘tinuod ba kaha ni akoa?’ I started to project for 3 or 5 years from now, unsa man gyud ang gusto nako sa akong kinabuhi? Then I realized nga gusto gyud nako magpari,” dugang pa niya.

Wala usab magmahay si Fr. Jonas sa maong desisyon gumikan kay nakita niya nga nindot gyud ang kinabuhi ang mahimong usa ka pari kay mamahimong makatabang sa laing tawo ug makatandog usab og  kinabuhi sa uban.

Usa usab, sa paghuman niya og tuon sa Philosophy and Theology didto sa University of Santo Tomas, nahimo siya nga cum laude.

Sa pagtungtong ni Father Jonas sa Roma, gibutyag niya nga miagi siya og pagsuway nga iya gyud nga gihilakan.

“Wa ko magdahom na makaya nako kay after a year, didto sa Roma niadtong 2000, kato bitaw nga nagkuha ko sa akong Licentiate, Master of Degree sa Civil, and oral exam. Sa exam, tubag lang ko na kay tubag niya wala ko kahibaw og sayop ba to og sakto. Right after the exam, niadto mi og Sta. Rita for a retreat. Pagnaog gyud nako, deretso gyud ko og Angelicum. Didto gyud ko nihilak kay paghand-over sa secretary sa result, niingon siya og: ‘Mejares, You’re Magna Cum Laude’”, saysay  pa niya.

Human sa maong kalampusan, mibalik siya sa nasud niadtong 2001, ug mipadayon siya sa iyang doctorate degree.

Sa pag-uli ni Fr. Jonas dinhi sa nasud, wala niya gihimakak nga adunay punto nga nakahuna-huna siya nga mohunong sa iyang gipili nga bokasyon.

Gani, nasuwayan gyud niya ang kinabuhi sa gawas sa seminaryo sama sa pag-inum, pag-uban sa barkada ug uban pa nga wala niya masuwayi sa dihang anaa siya sa sulod.

Gawas niana, wala gyud giukon-ukon og tubag ni Father Jonas nakasuway na usab siya nga mahigugma sa usa ka babaye.

Istorya pa ni Father nga childhood sweetheart sila kaniadto didto sa Bohol ug nagkita sila pagbalik sa dihang misulod na siya sa seminaryo.

“Sa high school, wa mi tagdanay. Wala gyud damha nga nagkita mi pagbalik. Wala man to’y uso ang cellphone kaniadto. Mogamit ko og telephone.  Magkita mi ig Sunday. Ako man siya nga classmate kaniadto, didto ra gyud ba. Magkuyog-kuyog ra gyud mi. And things go along the way, developed between us. Wala gyud mi label. Nahimo lang mi atong best of friends”, angkon pa niya.

Matud pa niya nga kahibawo ang maong babaye sa iyang pagbati alang niini.

Dali usab nga gibutyag ni Fr. Jonas nga gisuwatan gyud kini niya og kanta nga nag-uluhan og ‘Sigi, Undangon ko’.

Kun balikon pa ni Father ang panahon, matud pa niya nga kun wala siya mahimong seminarista, minyuan gyud niya kadtong babaye nga iyang naibgan.

Tuod man, lahi ra gyud ang kalipay nga iyang bation gumikan kay gipangita gyud niya ang kalipay nga iyang bation kun anaa siya sulod sa seminaryo. (BANAT NEWS)

  • Follow Us: